ئاژانسا خانی: تایبەت
رێڤەبەرێ کۆمپانیا بازرگانیا دەخلۆدانێ ل پارێزگەھا دھۆکێ گۆت: ئەڤ سالە ل ھەر سێ سایلویێن پارێزگەھا دھۆکێ بتنی شەش ھزار و ٩٦٥ تەنێن گەنمێ ژ جۆتیاران ھاتینە وەرگرتن و نوکە وەرگرتنا گەنمێ ژی هاتییه راوه‌ستاندن.
نازم مەحمەد عەلی، بۆ ئاژانسا خانی گۆت: ل سایلویا فەیدیێ ھزار و ٤٥٠ تەنێن ل سایلۆیا شێخان ھزار ٣٩٤ تەنێن ل سایلۆیا زاخۆ چار ھزار وپتر ژ ١٠٠ تەنان ھاتینە وەرگرتن ئەڤە د دەمەکێ دایە پشكا پارێزگەھا دھۆکێ ژ وەرگرتنا گەنمێ ١١٠ ھزار تەنێن گەنمێ بوون لێ ئەڤ سالە کێمترین رێژا گەنمی ژ جۆتیاران ھاتییە وەرگرتن”.
نازم مەحمەد، تەکەز کر، ئەڤ سالە كێزا سینگی وھشکەسالیی گەلەک کارتێکرن ل بەرھەمێ گەنمێ جۆتیاران کرییه و رێنمایێن به‌غدا بۆ وەرگرتنا گەنمێ داناین ژی کارتێکرن ل سەر وەرگرتنا گه‌نمی هه‌بوو و بھایێ کرینێ ل بازاری گرانتربوو ژ وێ بھایێ ل سایلۆیان ھاتییە دانان ئەڤە ژی بوویە ئه‌گه‌ر ھندەک جۆتیار گەنمی ل بازاری بفرۆشن.
