پرۆژێ به‌نداڤا خنس دێ هێته‌ ته‌مامكرن

رێڤەبەرێ سکرێ دھۆکێ دیار کر، پشتی حەفت سالان ژ ئەگەرێ قەیرانا دارایی کارکرن د پرۆژێ بەنداڤا خنس دا ل سنوورێ قەزا شێخان یا سەر ب پارێزگەھا دھۆکێ ڤە ھاتبوو راوەستاندن دوھی دووبارە دەست ب تمامکرنا وى پرۆژه‌ى ھاتە کرن.

ئەندازیار فەرھاد محەمەد تاھر، رێڤەبەرێ سکرێ دھۆکێ تایبه‌ت بۆ ئاژانسا خانى راگه‌هاند، ل سالا 2014ێ ژ ئەگەرێ قەیرانا دارایی کارکرن د پرۆژێ بەنداڤێ دا ھاتبوو راوەستاندن، بەلێ ل سەر فەرمانا سەرۆکێ حکومەتا ھەرێما کوردستانێ و بزاڤێن بەردەوام یێن وەزارەتا چاندن و ژێدەرێن ئاڤێ یا حکومەتا ھەرێما کوردستانێ و پارێزگەرێ دھۆکێ، دوھی بۆ رێگریکرن ل ھشکەسالیێ دووبارە دەست ب تمامکرنا پرۆژه‌ى ھاتەکرن.

ئاماژە ب هندێ كر، ئەڤ پرۆژە ب کوژمێ ھەشت ملیار و 781 ملیۆن و 70 ھزار دینار ژ لایێ کۆمپانیەکێ ڤە دھێتە بجهئینان و گۆت: “ڤێ بەنداڤێ شیانێن ھەلگرتنا شەش ملیۆن مەترێن سێجا یێن ئاڤێ ھەنە و دێ کەڤیتە د خزمەتا خەلکێ دەڤەرێ دا، ب تایبەتی تەخا جۆتیاران، ژبەرکو سەدان دۆنەمێن ئەردێ چاندنێ دێ پێ ھێنە ئاڤدان.