سەرۆکێ حکومەتا هەرێما کوردستانێ ئه‌ڤرۆ په‌یامه‌ك به‌لاڤكر و دیاركر: ئه‌ڤرۆ پێدڤییه هێز و لایه‌نێن كوردى و خه‌لكێ كوردستانێ ب گشتى، ب هه‌مان گه‌رماتیا ده‌مێ سه‌رهلدانێ به‌رگریێ ژ ده‌ستكه‌فت و مافێن خوه یێن ره‌وا بكه‌ن كو ب خوینا هزاران شه‌هیدان ب ده‌ستڤه هاتییه.
مەسرور بارزانی، سەرۆکێ حکومەتا هەرێما کوردستانێ د سالڤه‌گه‌را سه‌رهلدانا 1991دا گه‌رمترین پیرۆزباهیێن خوه ئاراسته‌ى گشت كوردستانێ، ب تایبه‌ت پێشمه‌رگێن قه‌هره‌مان و بنه‌مالێن سه‌ربلندێن شه‌هیدان كر و راگه‌هاند: سه‌رهلدان وه‌رچه‌خانه‌كا دیرۆكى و خوازت و په‌یاما ب هێزا گه‌لێ كوردستانێ بوو ژ ره‌دكرنا سته‌م و داگیركار و ژێرده‌ستیێ، ژ ئه‌نجامێ ئێكگرتى و ئێكرێزیا هه‌مى خه‌لكێ كوردستانێ ب گشت پێكهاتان، شیان ده‌ستكه‌فته‌كا مه‌زن ب ده‌ستڤه بینن و گه‌لێ كوردستانێ ببیته خودان دامه‌زرێنه‌رێن ده‌ستورى و بۆ داهاته‌كێ باشتر پێنگاڤان بینیت.
هه‌روه‌سا مەسرور بارزانی گۆت: ئێك ژ په‌یامێن گرنگ یێن سه‌رهلدانا 1991 ئه‌و بوو هه‌رده‌م خه‌لكێ کوردستانێ دەستبەرداری ماف و داخوازیێن نەتەوەیی و ژیانه‌كا ئازادانە نابیت، د سه‌رهلدانێ دا گه‌له‌ك قوربانى داینه.
مەسرور بارزانی، سه‌رۆكێ حكومه‌تێ ل داوییا په‌یاما خوه دا گۆت: ئه‌م خه‌لكێ خۆراگرێن كوردستانێ پشتراست دكه‌ین، ب هه‌مى شێوه‌یه‌كى داكۆكیێ ژ مافێن ده‌ستورى یێن خوه دكه‌ین و كوردستان وه‌ك نموونه‌كا گه‌ش یا پێشكه‌فتن و ئاڤه‌دان و پێكڤه‌ژیانا ئاشتیانه ب گشت پێكهاتان دێ مینیت.
