ئه‌ڤرۆ چارشه‌مبی سه‌رۆكێ هه‌رێما كوردستانێ، نێچیرڤان بارزانى و ماتیۆ تۆله‌ر، بالیۆزێ ئه‌مریكا ل ئیراقێ و شاندێ ل گه‌ل دا كو پێكهاتبوون ژ جۆن برینان، فه‌رماندێ هێزێن هه‌ڤپه‌یمانان ل عیراق و سووریێ، جینیفه‌ر گاڤیتۆ، هاریكارا وه‌زیرێ ده‌رڤه بۆ كاروبارێن عیراق و ئیرانێ، ئیتان گۆلدریچ، هاریكارێ وه‌زیرێ ده‌رڤه بۆ كاروبارێن سووریا، لوبنان و ئۆردن، مات پێرل نوونه‌رێ تایبه‌تێ ئه‌مریكا بۆ كاروبارێن سووریا و هژماره‌كا به‌رپرسێن سیاسى، دبلۆماسى و كونسولێ گشتی یێ ئەمریکا ل هه‌ولێرێ كۆمبوو.
د كۆمبوونێ دا دووماهى پێشهاتێن پرۆسا سیاسى، ره‌وشا ئێمناهییا عیراقێ، مه‌ترسیێن سه‌رهه‌لدانا داعشێ ل عیراق و سووریێ، په‌یوه‌ندیێن ئه‌مریكا ل گه‌ل عیراق و هه‌رێما كوردستانێ، بریارا دادگه‌ها فیدرالی ده‌رباره‌یى نه‌فت و غازا هه‌رێما كوردستانێ، چاكسازیێن وه‌زاره‌تا پێشمهرگهیی و ره‌وشا ناڤخۆ یا هه‌رێمێ به‌حسكرن.
شاندێ ئه‌مریكى پێگیرییا وه‌لاتێ خۆ بۆ به‌ره‌ڤ پێشبرنا په‌یوه‌ندیان ل گه‌ل عیراق و هه‌رێما كوردستانێ و كارێ هه‌ڤپشكێ د ناڤبه‌را وان دا، هاریكاری و هه‌ماهه‌نگیا د ناڤبه‌را پێشمهرگهیی و سوپایێ ئیراقێ دا بۆ به‌رهنگاربوونا داعشێ ب پێدڤى و گرنگ ل قه‌له‌م دا و هه‌ڤرا بوون كو تەبایی و ئێكرێزى یا ئالیێن سیاسى ل به‌غدا دێ پێگه‌هێ هه‌رێما كوردستانێ ب هێزتر كه‌ت و به‌رژه‌وه‌ندیێن وان دێ باشتر پارێزیت.
ژ ئالیێ خۆڤه نێچیرڤان بارزانى، سه‌رۆكێ هه‌رێما كوردستانێ بەحسێ هەبوونا جۆرەکێ ئالۆزبوونێ د پرۆسا سیاسى یا عیراقێ دا كر و گۆت: هه‌تا نوكه ئه‌و لێكتێگه‌هشتنا سیاسى نینه پرۆسێ به‌ره‌ف پێشڤه ببه‌ت، به‌لێ ب گرنگ زانى هه‌موو ئالیێن عیراقى د رژد بن ل سه‌ر هندێ كو ده‌لیڤه‌‌ك هاتییه پێش بۆ هندێ پرۆسا سیاسى بهێته سه‌ر راستكرن، هه‌روه‌سا سوپاسییا پشته‌ڤانى و هاریكارییا ئه‌مریكا بۆ عیراق و هه‌رێما كوردستانێ كر و دووپاتى ژى ل سه‌ر خواستا هه‌رێما كوردستانێ بۆ چاره‌كرنا كێشێن ل گه‌ل به‌غدا ب رێیا دانوستاندنان و بنه‌مایێن ده‌ستوورى كر.
پرسا ئازادییان، مافێن مرۆڤى، ره‌وشا ژنان ل هه‌رێما كوردستانێ، دووماهى پێشهاتێن ره‌وشا سووریێ و دەڤەرێ و هژماره‌كا پرسێن دى د كۆمبوونێ دا هاتنه به‌حسكرن.
