شاندهكێ جڤاتا نوونهرێن ئیراقێ ب سهرۆكاتییا جێگرێ سهرۆكێ جڤاتێ د گهل وهزیرێ پێشمهرگهیى و ئهفسهر و پلهدارێن وهزارهتێ ئهڤرۆ رۆژا دوشهمبى 4-1-2021ێ كۆم بوو و دانوستاندن ل سهر دوسهیێن سنۆرى و مافێن دارایێن پێشمهرگهى و پرسا ئهمنى كرن.
شۆرهش ئیسماعیل، وهزیرێ پێشمهرگهى یێ حكومهتا ههرێما كوردستانێ د پرێسكۆنفرانسهكى دا گۆت: ئكۆمبوونا د گهل شاندێ جڤاتا نوونهران بۆ وێ یهكێ بوو ههماههنگى د ناڤبهرا وهزارهتا پێشمهرگهى و سهرۆكایهتییا جڤاتا نوونهران دا بهرفرههبیت.
دهربارهیى رێككهفتنا ههڤپشك ژى وهزیرێ پێشمهرگهى دیاركر، پێشمهرگێ كوردستانێ شیایه تیرۆرستێن داعش تێك بشكێنیت و ههتا پێشمهرگه نهڤهگهریته ڤه وان دهڤهرێن كێشه ل سهر ئهو دهڤهر ئارام نابن.
گۆتى ژى: نها ئهو ل سهر وێ یهكێ رێككهفتینه كو دو ناڤهندێن سهرهكى و چار ناڤهندێن ههماههنگیێ د ناڤبهرا ئیراقێ و كوردستانێ دا ههبن بۆ هندێ كو هێزێن پێشمهرگهى بچنه وان دهڤهران ژ وان ژى( كهیوان- خانهقین- مهخموور- دهشتا نهینهوا). ئاشكرا ژى كر كو پێشمهرگه پشكهكن ژ سیستهمێ بهرگرییا ئیراقێ، ژبهر هندێ ئهو بهردهوام داخوازا مافێن دارایێن پێشمهرگهى ژ ئیراقێ دكهن و ئهو چهنده ژى زانییه كو پشكا پێشمهرگهى د بودجا 2021ێ یا ئیراقێ زێده بوویه.
ژ ئالیێ خوهڤه د. بهشیر حهداد، جێگرێ سهرۆكێ جڤاتا نوونهرێن ئیراقێ گۆت: دگهل لیژنا بهرگرى و ئاساییشا ئیراقێ ل دۆر سنۆرێن دناڤبهرا ههرێما كوردستانێ و ئیراقێ دا گۆتوبێژ كرینه و بهحسێ گاڤ و چاوانییا كاركرنێ پێكڤه ل سهر وان دوسێیهیان هات كرن، ههروهسا ئاریشێن زهڤیان دناڤبهرا كورد و عهرهبان دا دروست بووینه و ژ ئهگهرێ وێ چهندێ ژى سوپایێ ئیراقێ چوویه دناڤ وان كێشهیان دا، پێدڤییه ههماههنگى دناڤبهرا پێشمهرگهى و هێزێن ئیراقێ دا ههبیت.
