چاڤدێرەک: دامەزراندنا دەزگەھەکێ بۆ سکالایێن خەلکێ پارتی پێنگاڤەکا پیرۆزە

ئاژانسا خانی ، تایبەت:

ئێک ژ بڕیارێن کۆنگرێ ١٤ ێ ” دامەزراندنا دەزگەھەکێیە بۆ وەرگرتنا سکالایان و چاڤدێرەکێ سیاسی ژی ئاشکرا کر، دەزگەھێ سکالایان پێنگاڤەکا پیرۆزە و دێ بیتە پرەک دناڤبەرا سەرکردایەتییێ و جەماوەرێ پارتی.

ئاراس عەبدوللا، چاڤدێره‌كێ سیاسییه‌ بۆ ئاژانسا خانی دیارکر” کۆنگرێ پارتی ب شێوەیەکێ دیمۆکراتی بڕێڤەچوویە و راگرتنا بالانسێ ژلایێ سەرۆک بارزانی سەرکەفتنەکا دی یا پارتییە د کۆنگرێ ١٤ ێ” یێ پارتی، ھەروەسا گۆھۆڕینا پەیڕەوێ ناڤخۆیێ پارتی خالا ھەرە بھێز یا کۆنگرێ پارتییە، چونکی چەندین گۆھۆڕین ھاتینە کرن ژ وانا نەھێلانا لژنێن پیشەیی و دانانا سیستەمێ سزایی بۆ ئەڤان دەڤەرێن پارتی وەک پێدڤی دەنگان بدەستڤە نەئینیت.

ناڤهاتی گۆت ژی” دامەزراندنا لژنەکێ یان مەکتەبەکێ بۆ سکالایان دێ بیتە ئەگەر بۆ بھێزبوونا پارتی ل قووناغا داھاتی، چونکی بەری نوکە خەلکەکێ زۆر دناڤا پارتی دا گازندە ھەبوون دەزگەھەکێ تایبەت نەبوو خەلکێ پارتی بشێت گازندێن خوە بگەھینیت، بەلێ ئەگەر ئەو دەزگەھە بھێتە دامەزراندن و کەسێن شارەزا و دلسۆز تێدا کار بکەن” ئێدی دێ دەنگێ نەڕازی گەھیته‌ سەرکرداتییا پارتی.