ئیمارات بزاڤێ دكه‌ت به‌رهه‌مێن چاندنێ یێن كوردستانێ بكه‌ته‌ برانده‌كا جیهانى

كۆمپانییه‌كا ئیماراتى ل ئیداره‌یا سه‌ربه‌خۆ یا زاخۆ ده‌ست بجهئینانا پرۆژه‌یه‌كێ ستراتیجى دبوارێ چاندنێدا كرییه‌، و ئه‌وێ كۆمپانییێ دڤێت ب پشتبه‌ستن ب نووترین ته‌كنولۆجیایێ، چاندنا كوردستانێ پێشڤه‌ببه‌ت و به‌رهه‌مێ وێ بكه‌ته‌ برانده‌كا جیهانى.

ئه‌ڤرۆ 13ى چریا دووێ یا 2022ێ به‌رێ بنیاتى یێ قووناغا ئێكێ یا پرۆژه‌ى ل سنۆرێ ئیداره‌یا سه‌ربه‌خۆ یا زاخۆ هاته‌ دانان.

پرۆژه‌ ژلایێ كۆمپانیا ( ئه‌كترۆتیك )یا ئیماراتیڤه‌ دهێته‌ بجهئینان، دێ راهێنانان ب جووتیار و ده‌رچوییێن پشكا چاندنێ كه‌ت كو ب نووترین ته‌كنۆلوجییا سه‌رده‌م كارێ خوه‌ بكه‌ن و كه‌رتێ چاندنێ ل كوردستانێ پێشبێخن، هه‌روه‌سا دێ گرنگییێ ب كێمكرنا بكارئینانا ئاڤێ د چاندنێدا و ب بازاركرنا به‌رهه‌مێن وێ كه‌ت.

كۆمپانییێ راگه‌هاند، ته‌كنولۆجیا دێ رۆلى سه‌ره‌كى بینیت، و برێكا بكارئینانا سیسته‌مه‌كێ نوو یێ چاندنێ دشیاندایه‌ بكارئینانا ئاڤێ برێژه‌یا 70%ێ بهێته‌ كێمكرن، و ل دووڤ گوتنێن به‌رپرسێن كۆمپانییا ئه‌كترۆتیك، ئه‌ڤ پرۆژه‌ دێ 2500 ده‌رفه‌تێن كارى په‌یداكه‌ت.