ئه‌ڤرۆ ل باژێرێ هه‌ولێرێ مه‌سرور بارزانى سه‌رۆكێ حكومه‌تا هه‌رێما كوردستانێ، ڤه‌كرنا په‌یمانگه‌ها داهێنان و نووگه‌رییێ راگه‌هاند.
په‌یمانگه‌ها داهێنان و نووگه‌رییێ كو هزرا مه‌سرور بارزانییه و سه‌رۆكایه‌تییا بوردیێ وێژى دكه‌ت، دێ یا تایبه‌ت بیت ب ره‌خساندن و پشته‌ڤانیكرنا داهێنه‌ر و كه‌سێن خۆدان هزر، داكو بشێن برێكا ئه‌ڤێ په‌یمانگه‌هێ داهێنانێن وان دیاربكه‌ن.
مه‌سرور بارزانى د گوتارا خوه‌دا ل رێوره‌سمێن ڤه‌كرنا ئه‌ڤێ په‌یمانگه‌هێ راگه‌هاند، زێده‌بارى هندێ كو به‌رهه‌م و ده‌ستكه‌ڤتێن ئه‌ڤێ په‌یمانگه‌هێ ئێك ژ ئارمانجێن حكومه‌تا هه‌رێما كوردستانێ بوو، بۆ ئه‌وى بخۆژى تشته‌كێ گه‌له‌ك تایبه‌ته و هه‌رده‌م ڤه‌كرنا ناڤه‌نده‌كا ب ئه‌ڤى جوورى هیڤییا وى بوو، و گوت : هه‌موو ده‌مان ئێك ژ ئارمانجێن وى یێن سه‌ره‌كى دیتنا رێك و ده‌رفه‌تان بۆ به‌هره و شیانێن وه‌لاتییان ب تایبه‌تى گه‌نجان بوو.
سه‌رۆكێ حكومه‌تێ دامه‌زراندنا ئه‌ڤێ په‌یمانگه‌هێ ب وه‌چه‌رخانه‌كا گرنگ ب ئاراسته‌یێ گه‌شه‌پێدانا جڤاكى ل قه‌له‌مدا و راگه‌هاند، ڤه‌كرنا ئه‌ڤێ دامه‌زراوه‌یێ بۆ پێشڤه‌برنا شیان و به‌هره‌یێن گه‌نجان و پێشخستنا ئابوورێ وه‌لاتى یا گرنگه، و گوت: ئه‌ڤ په‌یمانگه‌هه ئه‌ڤرۆ دێ ده‌ستبكاربیت، دێ جهه‌ك بیت كو ژیانێ ب هزر و بیران بده‌ت، زانست و زانین دێ تێدا پێشكه‌ڤن و داهێنان دێ پێشكه‌ڤن و پاداشتان وه‌رگرن.
