سەرۆك وەزیرێن هەرێما كوردستانێ بەحس ل بزاڤێن حكومەتێ بۆ هەمەجۆركرنا ژێدەرێن داهاتی كر و راگەهاند، ل سالێن بهێت پەترۆل نامینیت، لەوما پێدڤییە پشتبەستنێ ل سەر چاندنێ بكەین، و ئەگەر ئەم كەرتێ چاندنێ پێشبێخین، مەترسی ل سەر ئاسایشا خۆراكی ل هەرێما كوردستانێ نامینیت.
مەسرور بارزانی، سەرۆكێ حكومەتا هەرێمێ د پارچە ڤیدیۆیەكێ دا دلگرانییا جۆتیاران ژ بێ بازارییا بەرهەمێن وان و بزاڤێن حكومەتێ بۆ چارەسەركرنا وێ كێشەیێ و هناردەكرنا بەرهەمێ نافخۆیی یێ وەلاتی ب تایبەتی فێقی بۆ دەرڤەی وەلاتی دیاركر و گۆت: دۆپاتییێ ل پشتەڤانییا جۆتیاران دكەین.
سەرۆكێ حكومەتێ ئاماژە ب وێ یەكێ ژی كر، پێدڤییە وەبەرهێنانا زێدەتر د كەرتێ چاندنێ دا بهێتەكرن و ئەڤ یەكە ژی دێ بیتە ئەگەر بۆ رەخساندنا زێدەتر یا دەلیڤێن كاری، هەروەكی چەوا ل هەر وەلاتەكی چاندن ” بنەمایێ درۆستكرنا ئابوورەكێ ب هێزە. “
