بێوار نێروه‌یی٭
ڕه‌وایه‌تی پێدان و ڕێكخستنا ده‌سه‌ڵاتان و په‌یوه‌ندی دناڤبه‌را وان دا، هه‌روه‌سا ده‌ستنیشان كرنا ئه‌رك و مافێن پارتێن سیاسی و دیاركرنا بازنه‌یا ماف و ئازادییێن هاوڵاتییان ب یاسایان دهێنه ڕێكخستن ب تایبه‌ت یاسایا ده‌ستوری كو بلندترین پێگه‌هێ یاسایی هه‌یه د وه‌ڵاتی دا.
ل هه‌رێما كوردستانێ نه‌بوونا ده‌ستوری بوویه هۆكارێ سه‌رهلدانا زۆر كێشه‌یێن سیاسی و ئیداری كو ئه‌ڤ كێشه‌یه ب به‌رده‌وامی د گوڕه‌پانا سیاسی دا هه‌ست پێ دهێته كرن.
نه‌بوونا ده‌ستوری هۆكاره بۆ پابه‌ند نه‌بوونا پارتێن سیاسی ب ده‌مێ هه‌لبژارتنان چونكه ده‌مێ ده‌ستور هه‌بیت د شیاندا نینه هه‌ر چه‌ند ساڵا ده‌ستور بهێته هه‌موار كرن داكو هه‌لبژارتنان پاشبێخن كو كێماسیه‌كا سیسته‌مێ نوینه‌رایه‌تی و دیموكراسی یه، چونكه هه‌موار كرنا ده‌ستووری زۆر یا ب زه‌حمه‌ت و ڕێكارێن وێ د درێژ و ئاڵۆزن وه‌ك یاسایه‌كێ كو ژ په‌ڕله‌مانی ده‌ردكه‌ڤیت نینه ئه‌ڤه‌ژی گه‌ره‌نتیه‌كه كو ب ده‌قێ ده‌ستووری ده‌مێ هه‌لبژارتنان بهێته ده‌ستنیشان كرن و پارتێن سیاسی خۆ دگه‌ل ڤی بابه‌تی بگونجینن.
نه‌بوونا ده‌ستووری هۆكاره‌كه ژبۆ دابه‌شبوونا كۆمه‌ڵگه‌هێ لسه‌ر ئایدۆلۆژی و میكانیزمێن جیاوازێن حكومڕانی و هه‌روه‌سا ژیانا شارستانی ژی چونكه ب ده‌قێ ده‌ستووری نه‌هاتییه دیار كرن كه ئایا ل هه‌رێمێ سیسته‌مێ سیاسی سه‌رۆكایه‌تیه یان په‌ڕله‌مانی، شوناسێ ئایینی ئایا سیكۆلاریزمێ په‌یڕه‌و دكه‌ت یان ئایین و ده‌وڵه‌ت لێك جودا نینن، په‌یوه‌ندییێن دناڤبه‌را ده‌سه‌ڵاتێن سه‌ره‌كی ب ده‌قێ ده‌ستووری نه‌هاتینه ڕێكخستن داكو جێگریه‌ك تێدا هه‌بیت و ژ میزاجێ كه‌سان ده‌ربچیت كو ئه‌ڤه‌ژی ئاڵۆزیێن به‌رده‌وام ژێ په‌ید‌ا دبن، ب ده‌ستووری تایبه‌تمه‌ندیێن لایه‌نێن حكومڕانییێ دهێنه ده‌ستنیشان كرن ئه‌ڤه ژی دبیته ڕێگره‌ك كو بایكۆت و ئیفلیجكرنا دام و ده‌زگه‌هێن حكومی نه‌هێته كرن و لایه‌نێن سیاسی یان ئۆپۆزسیۆن بن یان ده‌سه‌ڵات، و ژبۆ چاره‌سه‌ركرنا هه‌ر كێشه‌یه‌كا سیاسی و یاسایی په‌نایێ ببه‌نه به‌ر دادگه‌ها ده‌ستووری كو دێ ل دیف وی ده‌ستووری هێته دامه‌زراندن.
هه‌بوونا ده‌ستووری تا ڕاده‌یه‌كێ باش دبیته هۆكارێ ئێكپارچه‌ییا ئاخا كوردستانێ و ئه‌و هه‌ڕه‌شێن دوو ئیداره‌ییێ دێ ب دووماهی هێن.
په‌یوه‌ندییێن هه‌رێمێ و به‌غدا و په‌یوه‌ندییێن ده‌رڤه ب ده‌قێ ده‌ستووری شێوازێ فه‌رمی وه‌ربگرن (ب ڕێكا حكومه‌تا هه‌رێمێ بن) نه‌ك لایه‌نێن سیاسی.
دیاركرنا سیاسه‌تا گشتی یا ئابووری و ب تایبه‌ت كه‌رتێ نه‌فت و كانزایان و دیاركرنا بازنه‌یا به‌رهه‌م ئینان و وه‌به‌رهینانێ، یه‌ك هێزا له‌شكه‌ری و یه‌ك تیمیا كابینه‌یا حكومی ژ ئه‌نجومه‌نی وه‌زیران تاكو نزمترین یه‌كه‌یا ئیداری
ب ده‌ستووری بهێنه چه‌سپاندن.
خۆ ئاماده‌كرن بۆ چوونه ناڤ كۆمه‌ڵگه‌ها نیڤ ده‌وله‌تی بێی هه‌بوونا ده‌ستووری كێماسییه‌كا مه‌زنه وه‌كو زانایێ مه‌زن (هوریو) دبێژیت چوونه ناڤ كۆمه‌ڵگه‌ها نیڤده‌وله‌تی بێی هه‌بوونا ده‌ستووری وه‌ك چوونه ناڤ ئاهه‌نگێ یه ب جل و به‌رگێن خه‌وێ ڤه.
ئه‌ڤه و ده‌یان بوارێن دی یێن ژیان و حكومڕانیێ ل هه‌رێمێ پێدڤی یه باڵایی پێ بهێته دان و ببنه به‌شه‌كێ دۆكیۆمێنتا ده‌ستووری.
ئێدی ده‌مێ هندێ یه كو ده‌ستوور ببیته چوارچێوه‌یه‌كێ نه‌گۆڕ و هه‌موو لایه‌نێن سیاسی خۆ دگه‌ل ڕێسایێن وێ بگونجێنن.
٭ مامۆستایێ زانكۆیێ
