مێسى: فینال دووماهیك یارییا من یا مۆندیالێیه‌

ستێرا هه‌لبژارتییێ ئه‌رجه‌نتینێ لیونێل مێسى دووپاتكر، دێ ل ئێكشه‌مبییا بهێت دووماهیك یارییا خوه‌ د مۆندیالێدا كه‌ت.

مێسى بۆ رۆژنامه‌یا دیاریۆ دیپۆرتیڤۆ ئولێ یا ئه‌رجه‌نتینى دیاركر، ئه‌و هه‌ست ب كه‌یفخۆشییه‌كا مه‌زن دكه‌ت، ژبه‌ركو دشێت كاروانێ خوه‌ یێ مۆندیالێ ئه‌وێ ل سالا 2006ێ ده‌ستپێكرى، ب یارییا فینالێ بدووماهى بینیت.

زێده‌تر مێسى ئاشكراكر، گه‌له‌ك سال ده‌ربازبوون، ئه‌و وه‌سا دبینیت كو نه‌شێت پشكدارییێ د مۆندیالا بهێت دا بكه‌ت، و بدووماهى ئینانا كاروانێ مۆندیالێ ب یارییا فینالێ دێ بۆ وى باشترین رێك بیت، هه‌موو تشت د باشن و ریكۆرد ژى باشن، لێ یا گرنگ ئه‌وه‌ بشێن ئارمانجا تیمی بجهبینن، ئه‌و پێنگاڤه‌كێ د دوورن و دێ هه‌موو شیانان بۆ برنا ناسناڤى كه‌ن.

دهێته‌ زانین ئه‌ڤه‌ دبیته‌ مۆندیالا پێنجێ مێسى یێ 35 سالى پشكدارییێ تێدا دكه‌ت، و ل سه‌ر دییێگۆ مارادونا و خافییێر ماسكێرانوى پێشكه‌ڤت، كو هه‌ر ئێك ژ وان چار جاران پشكدارى كربوو، هه‌روه‌سا مێسى دبیته‌ باشترین گۆلكارێ ئه‌رجه‌نتینى د مۆندیالێدا، كو ب گۆلا خوه‌ یا شڤێدى ل سه‌ر كرواتیا هژمارا گۆلێن خوه‌ د مۆندیالێدا گه‌هانده‌ 11 گۆلان و ل سه‌ر هێرشبه‌رێ به‌رێ گابرییێل باتیستۆتاى پیشكه‌ڤت.