د. لەتیف رەشید، سەرۆککۆمارێ عیراقێ ب مەرەما پشکداریکرن د کۆمبوونێن کوربەندا ئابووری یا جیهانی دا گەهشتە داڤۆس یا سویسڕا.
ڕۆژا دوو شەمبی 16-1-2023، نڤیسینگەها ڕاگەهاندنا سەرۆککومارێ عیراقێ د ڕاگەهاندنەکێ دا باس ل وێ چەندێ کریە،” د ڕۆژانێن کۆنفڕانسی دا سەرۆککومارێ عیراقێ دێ دگەل ژمارەیەکا سەرکردێن وەلاتێن جیهانێ و سەرۆکێن سازییێن ئابووری یێن جیهانێ کۆمبیت بۆ گوتوبێژکرن لسەر چەند پرسەکان و گەهاندنا وێنەیێ ڕاستەقینە یێ وێ ڕەوشا ئەمنی و ئابووری یا ل عیراقێ هەی.”
لبن ناڤو نیشانێ” هەڤکاریکرن د جیهانەکا بەرەلا دا”، کۆربەندێ ئابووری یێ جیهانی ل باژێرکێ داڤۆس یێ سویسڕا، دێ پشکەک ژ بلندترین داڕیژەرێن سیاسەت و بازرگانێن جیهانێ کۆمکەت.
د دەمێ چوار ڕۆژان دا، زێدەتر ژ 250 پانێڵان دێ برێڤەچن، زێدەتری 2 هزار و 700 سیاسەتمەداران ژ 130 وەلاتان دێ پشکداربن کو 52 ژ وان سەرۆک و سەرۆکوەزیرێن وەلاتانن، هەر وەسا 370 کەسایەتییێن گشتی، زێدەتر ژ هزار و500 سەرکردێن بازرگانی و 90 داهێنەر و 56 وەزیرێن دارایی و 19 سەرۆکێن بانکێن ناڤەندی و 30 وەزیرێن بازرگانی و 35 وەزیرێن دەرڤە دێ ئامادەی خولا 53 یا سالانە یا کۆربەندی بن.
