وهزیرێ دارایی و ئابووری یێ حكومهتا ههرێما كوردستانێ، دگەل شاندەكێ كونسوڵخانهیا ئهمهریكا دەربارەی ئەنجامێن گوتوبێژێن دناڤبەرا هەولێر و بەغدا و ئاریشەیێن سیاسی یێن ناڤخۆییا هەرێما کوردستانێ و پێنگاڤێن چاکسازییی گوتوبێژکرن.
ل گۆرەی ڕاگەهاندنەکا وهزارهتا دارایی و ئابووری یا حكومهتا ههرێما كوردستان، ئاوات جهناب نووری وهزیرێ دارایی و ئابووری، دگەل شاندەکێ کونسوڵخانەیا گشتی یا ئەمهریکا ل هەولێرێ، ب سهرۆكایهتییا زەهرا بێڵ کونسولا گشتی یا ئەمهریکا ل هەولێرێ ب وەکالەت، کۆمبوو.
د کۆمبوونێدا وهزیرێ دارایی و ئابووری یێ حكومهتا ههرێما كوردستانێ ڕاگەهاند ، ههرێما كوردستانێ د چوارچووڤێ گوتوبێژێن دگەل بەغدا ل سەر پسکا بودجەیا 2023، ل بلندترین ئاستێ ئارامییێ سەرەدەری کریە.
وهزیرێ دارایی هیڤی خواست، بودجهیا گشتی یا عیراقێ بۆ سالا 2023 ب زووترین دەم بگەهیتە دناڤ هۆلا پەرلەمانیدا و بهێتە پەسەندکرن.
د چوارچووڤێ بەرنامێ چاکسازییێن حکومەتا هەرێما كوردستانێ دا، وهزیرێ دارایی باس ل پێنگاڤێن چاکسازیێ کر و ڕاگەهاند، رێکخستنا هێزێن پێشمەرگەیێ کوردستانێ و کۆمڤەکرنا وان ل بن خڤەتا وهزارهتا پێشمهرگەی، قۆناغێن باش دەربازکرینە و ئەوا گرێدای ب وەزارەتا داراییڤە هەمی کارئاسانی بۆ ئەوێ پرۆسەیێ کرینە و دێ د بەردەوامبن.
ژ لایێ خۆڤە زەهرا بێل، کونسولا گشتی یا ئەمهریکا، پەسنا رۆڵێ شاندێ هەرێما کوردستانێ کر، بۆ بەرەڤپێشڤەچوونا پێنگاڤێن بۆ ڕێککەفتنا دگەل حکومەتا عیراقێ ل سەور بودجە و دۆسەیێن نەفت و غازێ.
هەڤدەم کونسولا گشتی یا ئەمهریکا ل هەولێرێ ب وەکالەت، دەستخۆشی ل بڕیارێن جڤاتا وەزیران و وەزارەتا دارایی یا حکومەتا هەرێما کوردستانێ کر بۆ ئێکخستن و ڕێکخستنا هێزێن پێشمەرگەیێ کوردستانێ.
د تەوەرەکێ دی یێ کۆمبوونێدا باس ل ئاریشەیێن سیاسی یێن هەرێما کوردستانێ هاتە کرن، ڕۆناهی ئێخستە سەر کێمییا داهاتی ل سنوورێ پارێزگەها سلێمانییی، بۆ وێ ڕەوشێ ژی وەزیرێ دارایی ئەو پێنگاڤە بۆ بۆ وەفدێ مێهڤان رۆهنکرن، کو ب مەرەما ڕێکخستن و زێدەکرنا داهاتێ پارێزگەهێ هندەک ڕێکار بجهئیناینە.
