<h3 style="text-align: justify;"><span style="font-size: 18pt;">مه‌سرور بارزانى سه‌رۆكێ حكومه‌تا هه‌رێما كوردستانێ و ماوریتزیۆ گرێگانتى بالیۆزێ ئیتالیا ل عیراقێ كۆمبوون.</span></h3> <h3 style="text-align: justify;"><span style="font-size: 18pt;">سایتێ فه‌رمییێ حكومه‌تا هه‌رێما كوردستانێ راگه‌هاند، د كۆمبوونێدا كو میكێلى كامێرۆتا كونسۆلێ ئیتالیا ل هه‌ولێرێ تێدا یێ پشكداربوو، دووماهى گوهۆرین و ره‌وشا عیراق و ده‌ڤه‌رێ و پتر پێشڤه‌برنا په‌یوه‌ندییێن هه‌رێما كوردستانێ و ئیتالیا هاتنه گوتوبێژكرن.</span></h3> <h3 style="text-align: justify;"><span style="font-size: 18pt;">ل دووڤ راگه‌هاندنا حكومه‌تا هه‌رێما كوردستانێ، ته‌وه‌ره‌كێ سه‌ره‌كییێ كۆمبوونێ یێ تایبه‌ت بوو ب گوتوبێژكرنێ ل سه‌ر گرنگییا هه‌لبژارتنێن كوردستانێ، و دڤى بیاڤیدا سه‌رۆكێ حكومه‌تێ دووپاتكر، پێدڤییه ل ده‌مه‌‌كێ گونجاى یێ ئه‌ڤ ساله هه‌لبژارتن بهێنه‌كرن و نابیت ئێدى بهێنه پاشخستن.</span></h3> <h3 style="text-align: justify;"><span style="font-size: 18pt;">ئاماژه ب هندێ ژی دا، بالیۆزێ ئیتالیا په‌سنا چاكسازییێن كابینه‌یا نه‌هێ یا حكومه‌تا هه‌رێما كوردستانێ ل بوارێن دیجیتالكرنا خزمه‌تگوزارییێن گشتى و كاركرن ژ پێخه‌مه‌ت پاراستنا مافێن مرۆڤى ب گشتى و مافێن ئافره‌تان و به‌رهنگاربوونا توندوتیژییێ كر.</span></h3> <h3 style="text-align: justify;"><span style="font-size: 18pt;">سایتێ فه‌رمییێ حكومه‌تێ راگه‌هاند ژى، د پشكه‌كا دییا كۆمبوونێدا، گرنگیییا چاره‌سه‌ركرنا ئاریشه‌یێن دناڤبه‌را هه‌رێما كوردستانێ و حكومه‌تا فیدرالدا ل سه‌ر بنه‌مایێن ده‌ستوورى و ب شێوه‌یه‌كێ بنه‌ره‌تى دووپاتكر.</span></h3>
