لەیلا عەبدولجەبار: قانوونا کاری دێ کاریگەری لسەر رەوشا کرێکاران ھەبیت

ئاژانسا خانی ” تایبەت:

ئەندامەکا لژنا کارۆبارێن جڤاكی ل پەرلەمانێ کوردستانێ ئاشکرا کر، ئێک ژ وان قانوونێن گرنگ یێن ژلایێ ڤێ خۆلا پەرلەمانی ھاتییە پەسەند کرن قانوونا کارییە ل ھەرێما کوردستانێ و دێ کاریگەری ل سەر رەوشا کرێکاران ھەبیت و لدووڤ قانوونێ دێ دەلیڤێن کاری ژی بۆ وه‌لاتییان پەیدا بن.

لەیلا عەبدولجەبار، ئەنداما لژنا کارۆبارێن جڤاكی بۆ ئاژانسا خانی دیار کر”  ئێک ژ وان قانوونێن گرنگ یێن ژ لایێ پەرلەمانێ کوردستانێ ھاتینە دەرکرن قانوونا کارییە ل ھەرێما کوردستانێ و پتر ژ ١٠٠ مادە و بڕگان پێکھاتییە، بەری دەرچوونا قانوونا کاری ل ھەرێمێ کار ب قانوونا عێراقێ دھاتە کرن و زۆر کێماسی تێدا ھەبوون، بەلێ قانوونا کاری ل ھەرێما کوردستانێ کاریگەری یێن زۆر ل سەر رەوشا کرێکاران ھەیە، ژبەرکو بابەتێ کاری ھاتییە رێکخستن و ل سەر ستانداردێن نێڤدەولەتی قانوونا کاری ھاتییە دەرکرن.

ناڤهاتییێ گۆت ژی” ژ چەندین لایانڤە مافێ کرێکاران دناڤا قانوونێ دا ھاتییە پاراستن ژوان ژی دەمێ کرێکار دناڤا کاری دا تووشی روودانەکێ دبیت و بۆ دەمەکی نەشێت کار بکەت مافێ کرێکاری یێ پاراستییە و ھەم چارەسەری بۆ بھێتە کرن ھەم ژی کرێیا کاری بۆ بھێتە مەزاختن، ھەروەسا کرێکارێن دەستەبەرکری دێ ھێنە خانەنشین کرن .

لەیلا عەبدولجەبار دبێژیت ژی:” ئێک ژ وان خالێن دی یێن گرنگ دەلیڤا کارییە بۆ خەلکێ ھەرێما کوردستانێ و لدووڤ قانوونێ ھەر جھەکێ کاری پێدڤییە ٧٥%ێ کرێکارێن ناڤخۆ بن و ب تنێ ٢٥% ێ کرێکارێن بیانی بن ئەڤە ژی دبیتە ئەگەرێ پەیداکرنا دەلیڤا کاری بۆ وەلاتییان و ئەو بارگرانییا بەری نوکە ھەیی ل سەر حوکمەتێ بۆ دامەزراندنێ دێ کێمتر بیت و دەلیڤێن کاری دێ بۆ وه‌لاتییان پەیدا بن.