به‌غدا گه‌نمى ناده‌ته‌ هه‌ولێر و سلێمانییێ بۆ به‌لاڤكرنا پشكا چارێ یا ئارێ ئه‌ڤ ساله‌

سوبه‌هى ل پارێزگه‌هێن عیراقێ گه‌را پێنجێ یا ئارێ ئه‌ڤ ساله‌ دێ هێته‌ به‌لاڤكرن، د ده‌مه‌كیدا ل هه‌ردوو پارێزگه‌هێن سلێمانى و هه‌ولێرێ به‌لاڤكرنا پشكا چارێ یا ئارى تمام نه‌بوویه‌.

وه‌زاره‌تا بازرگانییا عیراقێ راگه‌هاند، سوبه‌هى رۆژا چارشه‌مبى دێ پشكا پێنجێ یا ئارێ ئه‌ڤ ساله‌ هێته‌ به‌لاڤكرن.

رێڤه‌به‌رییا دروستكرنا ده‌خلۆدانێ سلێمانییێ دیاركر، ب رێژه‌یا 75%ێ گه‌نم بۆ پشكا چارێ یا ئارێ ئه‌ڤ ساله‌ ژ جۆتیاران هاتییه‌ وه‌رگرتن، لێ عیراقێ گوتییه‌ وان كو ئێدى گه‌نمى نه‌وه‌رگرن، و ئه‌و نزانن بۆچى عیراق ڤێ چه‌ندێ دكه‌ت، ئه‌وان ب نڤیساره‌كا فه‌رمى عیراق ئاگه‌هداركرییه‌ كو گه‌نم ل كه‌ركووك و سلێمانییێ هه‌یه‌، لێ رێكێ ناده‌ن وه‌ربگرن.

هه‌روه‌سا لادێ ئیبراهیم رێڤه‌به‌را ته‌كنیكییا رێڤه‌به‌رییا دروستكرنا ده‌خلۆدانێ هه‌ولێرێ ئاشكراكر، نڤیسارا فه‌رمى بۆ وان چوویه‌ كو ده‌ست ب به‌لاڤكرنا پشكا پێنجێ یا ئارێ ئه‌ڤ ساله‌ بكه‌ن، لێ هێشتا به‌لاڤكرنا پشكار چارێ تمام نه‌بوویه‌ و ب رێژه‌یا 75%ێ هاتییه‌ به‌لاڤكرن، ئه‌گه‌ر هه‌موو هاته‌ به‌لاڤكرن، دێ شێن دماوێ سێ رۆژاندا ده‌ست ب به‌لاڤكرنا پشكا پێنجێ یا ئارى كه‌ن. 

رێڤه‌به‌را ته‌كنیكییا رێڤه‌به‌رییا دروستكرنا ده‌خلۆدانێ هه‌ولێرێ دیاركر، ئه‌و چاڤه‌رێنه‌ گه‌نمێ ئه‌مریكى بهێت و ب رێژه‌یا 10%ێ تێكه‌لى گه‌نمێ خۆمالى بكه‌ن، ژبه‌ركو ئه‌و بریاره‌ بۆ هه‌موو عیراقێیه‌ و دڤێت گه‌نمێ ئه‌مریكى تێكه‌لى گه‌نمێ خۆمالى بكه‌ن.