نێزیکی 600 دیکل و مریشکێن کوردی ژئەگەرەکێ نەدیار ل ل گوندێ ئاڤهێ یێ سەرب دەڤەرداریا باتیفا ڤە ل سنۆرێ قه‌زا زاخۆ ئەڤرۆ ل دانێ ئێڤارێ روژا شەمبیێ پێکڤە مرن .
ردوان عابد ئەمین، ئاكنجیێ گوندێ ئاڤهێ یێ چەندین سالە ل گوندی کارێ خودانکرنا تەرش و کەوالی دكه‌ت، ل دۆر بویەرا مرنا دیکل و مریشکێن مری تایبەت بۆ خانی نیوز دیار كر، جارا ئێکێ یه ب ڤی ڕەنگی مریشك و دیكل پێکڤە دمرن و چەندین سالە ب خودان دکەت، رۆژانە وى ل دووڤ ڕێنمایێن ڤێتێرنەری سه‌ره‌ده‌رى د گه‌ل دا دكر و هەیڤانە ژی دەرمان و ڤاکسین دکرن بۆ وى ژی جهێ حیبەتیێ یە هەتا نوکە نزانیت ژبەر چ و چەوا ب ڤی ڕەنگی وەسا دمرن، نێزیکی 600 دیکل و مریشکێن ڕەسەن یێن خۆمالی بووینە و هەمی مرینە.
ل دۆر وێ یه‌كێ په‌یامنێرێ خانى نیوز پەیوەندی ب ڤێتێرنه‌رییا باتیفا کر کا ژ رویێ ساخلەمیێ ڤە و دیسان ترسا وان چیه؟ ئیسماعیل سلێمان، بەرپرسێ ڤێتێرنه‌رییا باتیفا گۆت: ئەو نەشێن دیار بکەن کا ژبەر چ و ب چ نه‌خۆشى مرینە، دبیت خوارنەک بیت یان ژی نەخۆشیەک بیت، لێ هەتا پشکنینان نەکەن نەشێن بریارێ بدەن کا ئەنفلونزا بالندایە یان ژی جورەکێ دی یێ نەخوەشیێ یە .
ئه‌ڤرۆ ل پاێزگه‌ها سه‌لاحه‌ددین یا ناڤه‌راستا ئیراقێ ئه‌نفله‌وه‌نزا بالندا په‌یدا بوویه و ژ ئه‌گه‌رێ وێ یه‌كێ هه‌ژماره‌كا مه‌زن یا مریشكان مرینه، به‌رپرسێن وێ پاریزگه‌هێ ژى دوپاتى ل په‌یدابوونا وێ نه‌خۆشیێ دكه‌ن، حكومه‌تا هه‌رێما كوردستانێ ژى دێ رێكارێن پێدڤى بۆ به‌رسینكگرتنا وێ نه‌خۆشیێ گریته به‌ر.
خانى نیوز، نزار مه‌جید گولى، باتیفا
