رێككهفتن ل سهر ژمارهیهكا خالان دناڤبهرا لایهنێن سهركهفتى د ههلبژارتنێن جڤانا پارێزگهها كهركووكێ دا ژ بۆ پێكئینانا حكومهتا خۆجهى ل وێ پارێزگههێ هاته كرن.
نوینهرێن هێزێن سیاسى یێن سهركهفتى د ههلبژارتنێن جڤاتا پارێزگهها كهركووكێ دا ئهڤرۆ چارشهمبیێ ب سهرپهرشتیا سهرۆكوهزیرێ ئیراقێ محهمهد شیاع سوودانى ژ بۆ بلهزكرنا پێكئینانا حكومهتا خۆجهى ل كهركووكێ كۆمبوون.
ل گۆرهى راگههاندنا ئۆفیسا سوودانى؛ لایهنێن كۆمبوونێ ژ بۆ بلهزكرنا پێكئینانا حكومهتا خۆجهى یا كهركووكێ ل سهر ڤان خالان رێككهفتن:
– لبهرچاڤوهرگرتنا بهرژهوهندیێن خهلكێ كهركووكێ، پاراستنا پێكڤهژیانێ و دهستوور ببیته سیهوانه بۆ ههمیان.
– شهراكهت و تهوافوق و نهدویركرنا چ لایهنان بنیاتێ كارى بیت.
– پێكئینانا فراكسیۆنا برێڤهبرنا كهركووكێ ژ لایێ ههمى هێزێن سهركهفتى د جڤاتا پارێزگههێ دا و سهرۆكوهزیرێ ئیراقێ سهرۆكاتیا كۆمبوونێن وێ بكهت ههتا حكومهتا خۆجهى بهێته پێكئینان و رێككهفتن ل سهر بهرنامه و میكانیزم و پهیرهوێ ناڤخۆیى یێ فراكسیۆنێ بهێته كرن.
– بهرههڤكرنا بهرنامهیێ برێڤهبرنا ناڤخۆیى ل كهركووكێ و هێزێن دناڤ فراكسیۆنێ دا پێگیریێ پێ بكهن و كارگێریا نوى یا پارێزگههێ وى بهرنامهى بجهبینیت.
– هێزێن سیاسى یێن پشكدار د كۆمبوونێ دا د دهمێ حهفت رۆژان دا كاغهزێن كارى پێشكێشبكهن و تێدا دیتنا خۆ بۆ بهرههڤكرنا بهرنامهیهكێ گشتگیر بۆ پارێزگههێ و میكانیزمێن گونجاى بۆ پێكئینانا حكومهتا ناڤخۆیى ل پارێزگههێ پێشچاڤبكهن.
بهرى نوكه ههر ئێك ژ پارتى و ئێكهتى ل كهركووكێ ل سهر وێ چهندێ رێككهفتبوون كو ههردو فراكسیۆن پێكڤه دانوستاندنان ل گهل پێكهاتهیێن كهركووكێ بۆ پێكئینانا حكومهتا خۆجهى بكهن.
