ئاژانسا خانی:
سه‌رۆكێ په‌یمانگه‌ها ڤه‌كۆلینێن ئه‌مریكی _ كوردی” تایبه‌ت بۆ ئاژانسا خانی دیار كر: سه‌ره‌دانا سه‌رۆكێ هه‌رێما كوردستانێ بۆ ئیرانێ” گه‌له‌ك گرنگییا خۆ هه‌یه و د ده‌مه‌كێ گه‌له‌ك هه‌ستیار دایه” د هه‌مان ده‌مدا” ئیران وه‌لاته‌كێ جیرانه ل گه‌ل هه‌رێما كوردستانێ” مه به‌رژه‌وه‌ندییه‌كا گه‌له‌كا هه‌ڤپشك ژ لایێ ئابووری و سیاسی و ئه‌منی و ئاسایشێ ڤه ل گه‌ل ئیرانێ هه‌یه و مه سنۆره‌كێ دوور و درێژ ژی كو ب درێژاهییا 650 كیۆمه‌تران ل گه‌ل وه‌لاتێ ئیرانێ هه‌یه.
ناڤهاتی گۆت ژی: هه‌كه پێشتر په‌یوه‌ندییێن ئیرانێ و هه‌رێما كوردستانێ ئه‌ڤرازی و نشیڤی تێدا هه‌بن” به‌لێ ب ڤێ سه‌ره‌دانا نێچیرڤان بارزانی” سه‌رۆكێ هه‌رێما كوردستانێ” دێ په‌یوه‌ندییێن هه‌رێمێ ل گه‌ل ئیرانێ چنه قووناغه‌كا گه‌له‌ك باشتر و دیسان ئه‌و پێشوازییا ل سه‌ر ئاستێن بلند یێن ئیرانێ ل سه‌رۆكێ هه‌رێمێ هاتییه كرن” واتایه‌كا مه‌زن هه‌یه” هه‌ر ژ رێبه‌رێ بلند یێ كۆمارا ئیسلامییا ئیرانێ” سه‌رۆككۆمارێ ئیرانێ و وه‌زیرێ ده‌رڤه یێ ئیرانێ” ئه‌ڤه وێ دگه‌هینیت” كو ئیران ب گرنگڤه به‌رێ خۆ دده‌ته رۆلێ هه‌رێما كوردستانێ” وان دڤێت په‌یوه‌ندییێن خۆ ل گه‌ل هه‌رێما كوردستانێ بهێزتر لێ بكه‌ن و ئه‌و ئاریشێن هه‌ین ژی” بهێنه چاره‌سه‌ر كرن” دیسان په‌یوه‌ندیێن هه‌رێمێ ل گه‌ل ئیرانێ بچنه قووناغه‌كا گه‌له‌ك پێشكه‌فتیتر.
هێشتا دبێژیت: ئیرانێ دڤێت هه‌رێما كوردستانێ فاكته‌ره‌كێ بهێز بیت” د ناڤخۆیا عیراقێ دا” بۆ هندێ داكو كورد هه‌ڤپشكه‌كێ ستراتیجی بیت بۆ پێكئینانا حكومه‌تا به‌غدا” هه‌روه‌سا ئیرانێ دڤێت رۆلێ هه‌رێما كوردستانێ ل ناڤخۆیا عیراقێ رۆله‌كێ گرنگ هه‌بیت” بۆ راگرتنا بالانسا حكومه‌تا عیراقێ” چونكی هه‌كه په‌یوه‌ندییێن هه‌رێمێ ل گه‌ل به‌غدا نه د بهێز بن” دێ حكومه‌تا شیعی ل به‌غدا كه‌ڤیته د مه‌ترسییێ دا” له‌وا ئیرانێ دڤێت رۆلێ هه‌رێما كوردستانێ یێ باش دناڤا عێراقێ دا” هه‌روه‌سا ئیرانێ دڤێت قووناغه‌كا نوو ل گه‌ل هه‌رێما كوردستانێ ده‌ستپێ بكه‌ت” ل سه‌ر ڤی بنه‌مایی ئیرانێ ب ره‌نگه‌كێ فه‌رمی سه‌رۆكێ هه‌رێما كوردستانێ داخواز كره ئیرانێ و ب فه‌رمی ئالایێ كوردستانێ ل ئیرانێ هاته بلند كرن.
كارۆخی گۆت ژی: ل ڤێ ده‌ڤه‌رێ هه‌رێما كوردستانێ یا شییایی ڤێ بالانسێ راگریت” هه‌م ل گه‌ل ئیرانێ هه‌م ژی ل گه‌ل توركیا” په‌یوه‌ندییه‌كا دوستانه هه‌یه” نوكه و به‌ری نوكه و بۆ ده‌مێن بهێت ژی هه‌رێم دێ شێت ڤێ بالانسێ راگریت” په‌یوه‌ندییه‌كا ئاسایی ل گه‌ل وه‌لاتێن كه‌نداڤی و ئه‌مریكا ژی هه‌یه.
