<h2>سەرۆك مەسعود بارزانی پەیامەك ب هەلكەڤتا 38 سالییا كارەساتا ئەنفالێ بەلاڤكر.</h2> <h2> دەقێ پەیاما سەرۆك بارزانی:</h2> <h2> ب ناڤێ خۆدایێ مەزن و دلوڤان ئەنفال برینەكا كوورە د دلێ هەموو خەلكێ كوردستانێدا، ئیكە ژ مەزنترین تاوانان كوژلایێ دەستهەلاتدارێن پێشتر یێن عیراقێڤە ب شێوەیەكێ سیستەماتیك و ئارمانجدار دژی گەلێ كوردستانێ هاتییە كرن، ژ ئەنجامێ ڤێ كریارا نەمرۆڤایەتی 182 هزار وەلاتییێن كورد بێی كو تاوانەك كربیت و ژبەركو ب تنێ كوردبوون بێسەروشوون بوون و هاتنە شەهیدكرن، هەروەسا كیمیارانكرن، تەعریب، دەركرنا ب زووری، گوهۆرینا دیموگرافی و وێرانكرنا ب هزاران گوندان و بزاڤكرن بۆ تێكدانا هەموو بنەمایێن ژیانێ ل كوردستانێ، پشكەكا دییا ئەوان تاوانان بوو كو حكومەتا پێشتر یا عیراقێ ب دژی گەلێ كوردستانێ كرین.</h2> <h2> ئەنفال زۆلمەكا مەزن بوو د هەمان دەمدا وانەیەكا گرنگە بۆ نڤشێ نوكە و داهاتی كو نابیت ل ژێر چ ڕەوشدا بهێتە پشتگۆهخستن، پێدڤییە ل ئاستێ نێڤدەولەتی ئەڤ تاوانە ب جینۆساید بهێتە نیاسین و ل ئاستێ عیراقێ ئەو پشتراستییە هەبیت كو ئەڤ تاوانە بەرامبەر گەلێ كوردستانێ چ جاران دووبارە نابن، هەروەسا ئەركێ سەر ملێن دەولەتا عیراقێیە قەرەبوویا ئەنفالێ و ئەوێ جینۆسایدێ بكەت یا ب دژی مللەتێ مە هاتییە كرن.</h2> <h2> ل هەلكەڤتا 38 سالییا كارەساتا ئەنفالێ هزاران سلاڤان بۆ گیانێ پاقژێ شەهید و ئەنفال و هەموو شەهیدێن كوردستانێ دهنێرین، هەڤپشكێ خەم و ئازارێن خێزان و كەسوكارێن سەربلند یێن ئەنفالێینە.</h2> <h2> مەسعود بارزانی 14ی نیسانا 2026ێ</h2>
