هەلبژارتن و رێزگرتی ل ئیرادا مللەتی

ئیحسان ئامێدی

هەلبژارتنێن گشتی پرۆسەیەکا فەرمی و رێکخستییە بۆ هەلبژارتنا نوونەر و کاربدەستێن ئەرک و پایەیێن تەڤایی ب رێکا دەنگدانێ، داکو نوونەریا مللەتی بکەن، ئەڤە شێوازەکێ دیموکراتییە بۆ پشتگیری و رەوایی پێدانێ ب دەستهەلاتێ، لڤێرە رۆلێ وەلاتییێ دەنگدەر ئێکلاکەرە د دەستنیشانکرنا نوونەرێ خۆ دناڤ کۆمەکا بەربژاراندا.
ئیرادە شیانا بریاردانا هشیارانە ب رێکەکا گونجایی بۆ ئەنجامدانا کارەکێ دیارکری
یان ئارمانجەکا دەستنیشانکری.
ئیرادا تەڤایی ئیرادا تەڤایا مللەتی یە، ئارمانجا وی بجهئینانا بەرژەوەندا گشتییە، ئەڤە ژی لدووڤ یاسایێ دهێتە بکارئینان بۆ هەلبژارتنێن گشتی یێن سەرۆکێ وەلاتی یان نوونەرێن مللەتی ل پەرلەمانی یان بۆ بریارێن چارەنڤێسی لسەر پاشەرۆژا مللەتی و سیستەمێ حوکمرانی و پەسەندکرنا دەستوری و راستڤەکرنا وێ و گرێدانا پەیوەندیان دگەل لایەنەکێ تایبەت.
دەستهەلاتا دەربرینێ ژ ئیرادا مللەتی دکەت ئەوە یا برێکا هەلبژارتنێن گشتی ل دووڤ یاسایێ دهێتە رێکخستن و مللەت بجهدئینیت ب دەنگدانێن نهێنی.
بریارێن چارەنڤێسی یێن دەربرینێ ژ ئیرادا مللەتی دکەن دڤێت ب راپرسیێن گشتی دەنگ ل سەر بهێتە دان.
دبێژن دیموکراتی سیستەمەک باش نینە!، بەلێ هەمی سیستەمێن دی ژ وێ خرابترن!، چونکی مەرج نینە دهەلبژارتن و راپرسییێن دیموکراتیدا ئەنجام د دلخواز بن، بەلکی دەلیڤا سەرکەفتنا یێ خراب ژی هەیە!. بەلێ ژبەرکو باشترین سیستەمە و دەربرینێ ژ ئیرادا پتریا مللەتی دکەت دڤێت رێز لێ بهێتە گرتن و کار پێ بهێتەکرن، د هەمی هەلومەرجاندا دڤيت ئەنجامێن هەلبژارتنان بهێن پەژراندن و ب ئەرێنی سەرەدەری دگەلدا بهێنە کرن.
هەرێما کوردستانێ کیانەکێ فیدرالییێ دەستورییە د دەولەتا عیراقا هەڤگرتیدا، ماف و ئەرک و دەستهەلاتێن وێ یێن دەستوری د دیارکرینە، لدووڤ سیستەمێ دیموکراتی نوونەرێن خۆ دهەلبژێریت و کاروبارێن خۆ برێڤە دبەت، ژ بەر هندێ ل سەر لایەنێن سیاسیێن هەرێما کوردستانێیە، بۆ هەمی پرسێن گرێدایی هەرێما کوردستانێ، ل هەرێما کوردستانێ و دناف خۆدا چارەسەر و ئێکلابکەن، پەنایێ نەبەنە بەر لایەنێن دەرەکی بۆ ئێکلاکرنا هەڤرکیێن نافخۆیی!.
بەلێ دڤێت ل ئاستێ هەرێما کوردستانێ گەنگەشەکا بەرفرەها سیاسی و یاسایا بابەتی بهێتە کرن و بگەهنە ئەنجامان و بشێت بەرژەوەندێن گشتی بجهبینیت و سەرفرازیا مللەتی ب پارێزیت.
وەکو هەرێما کوردستانێ سیستەمێ دیموکراتی پەژراندی و کارپێکری، و هەلبژارتنێن گشتی ئەنجامدان دڤێت رێز ل پرانسیپ و ئەنجامان بهێتەگرتن و کار پێ بهێتەکرن.
پێدڤییە چاوان هەلبژارتنێن گشتی بۆ پەرلەمانێ کوردستانێ و عیراقێ دهێنە کرن دڤێت ب وێ ئیرادێ دەستنیشانا نوونەرێن گەلێ کوردستانێ بهێتە کرن بۆ پۆست و پایەیێن سەروەری ل ئاستێ عیراقێ ژی. دڤێت هەرێما کوردستانێ دەستنیشانا نوونەرێن خۆ بکەت بۆ وان پۆستان یێن سروشتەکێ گشتی و سەروەری هەیی، ئەڤە ژی دبیت ب رێکا هەلبژارتنەکا گشتی یا تایبەت بۆ وان پوستان ل ئاستێ هەرێما کوردستانێ، یان ب رێکا نوونەرێن هەلبژارتیێن هەرێما کوردستانێ، یان ب رێکەفتنا هێزێن سیاسیێن کوردستانی، ئەو ژی لدووڤ پەیرەوەکێ پیڤەرکری کو دەنگێ هەر لایەنەکێ سیاسی لدووڤ قەبارێ وێ یێ دەنگێن هەلبژارتنێن گشتی و نوونەرێن وی د پەرلەمانی دا بیت، بەربژارێ وان پۆستان نوونەراتیا هەرێما کوردستانێ بکەت نە لایەنەکێ سیاسی.
کەساتیکرن و حزبیکرنا پرسێن نەتەوەیی و نیشتیمانی و چارەنڤیسی پێچەوانەیا ئارمانج و بەرژەوەندێن گشتییە، یا کرێتر بکارئینانا هێزێن دەرەکی بۆ بدەستڤەئینانا پۆستێن بەهرا هەرێما کوردستانێ، ئێکلاکرنا هەڤرکیێن نافخۆیێن هەرێمێ، د دەمەکیدا ئەڤە ژ ئەرک و دەستهەلاتێن ناڤخۆیێن هەرێما کوردستانێ نە، د شیانێن لایەنێن سیاسیدایە د چارچووڤێ یاسایێدا بەرئێکڤە بینن و ئێکلاکەن.
مخابن ئەڤە چەندین جارە هەرێما کوردستانێ دکەڤیتە د تەنگاڤیێن بکارئینانا مافێن خۆ ل ئاستێ عیراقێ، نە رێزێ ل ئەنجامێن هەلبژارتنان و دەنگێن مللەتی و قەوارەیێ لایەنێن سیاسی دگرن و نە لێکتێگەهشتنێ پێکدئینن، هەروەکو باوەری ب بنەمایێن دیموکراتیەتی نە!، ئەڤە راستگویێ ناهێلیت و ئیرادا چارەسەریێ ل هەرێمێ لاواز نیشا ددەت!. یا پێدڤیە دەمێ پرسەک ئاسێ دبیت و بەرئێکڤە نەهێت پەنایێ ببەنە بەر مللەتی و ئەو ژی ب هەلبژارتنەکێ یان ب راپرسینەکێ بریارا ئێکلاکەر و پێگیر بدەت. هەر چاوابیت نابیت پێکهاتێن نە کوردستانی مایێ خۆ د پرسێن کو ژ ماف و ئەرک و دەستهەلاتا هەرێمێ نە بکەن و تاگیریێ بکەن و ئێکلاکەن!.

خەباتا رزگاریخوازا کوردستانێ ژ پێخەمەتی هندێ بوو کو کوردستان ببیتە خودان کیانەکێ سیاسی و یاسایی و نەتەوەیی و ئەو بخۆ خودانێن بریارا خۆ بن، نهۆ دەرفەتا هندێ هەرێما کەردستانێ ب ژیرانە ڤی مافی بکاربینیت و هەمی ماف و شایستەیێن دەستوریێن هەرێمێ بدەستڤەبینیت.
پێدڤییە رێزێ ل خۆ بگرین و پرانسیپێن دیموکراتیەتێ بجهبینین و دەستهەلاتێن خۆ یێن دەستووری و یاسایی بکاربینین ژبۆ گەشەکرنا هەرێمێ و سەرفرازکرنا خەلکێ وێ.
دڤێت مللەت لێ ڤەگەر بیت، رێز ل ئیرادا مللەتی بهێتە گرتن و نابیت زێدەگاڤی ل سەر مافێن مللەتی بهێتە کرن.
هەروەکو سەرۆک بارزانی دبێژیت: (نابیت یاری ب ئیرادا مللەتی بهێتەکرن و ريککەفتنێن گومانلێکری دژی ئیرادا مللەتی بهێنەکرن).
ئێدی پێکڤە ژبو کوردستانەکا ئازاد و ئارام و مللەتەکێ بەختەوەر.