مەسرور بارزانی: ڤەكێشانا پاتریۆكێن ئەمریكا دێ هەرێما كوردستانێ ئێخیتە د مەترسییێدا

مەسرور بارزانی، سەرۆكوەزیرێن هەرێما كوردستانێ ڕاگەهاند، هەرێما كوردستانێ پێدڤییەكا بلەز ب هێزكرنا شیانێن خۆ یێن بەرگرییا ئاسمانی هەیە داكو ڕووبروو ئەوان گەفێن بەردەوام بیت یێن ب ڕێیا درۆنێن بۆمبرێژكری ژلایێ ئیرانێ یان میلیشیایێن سەر ب ئیرانێڤە ل عیراقێ دهێنە ئاراستەكرن.
سەرۆكوەزیران د دیدارەكێدا دگەل پێگەهێ ئەلمۆنتەر دیاركر، پشتی دەستپێكرنا شەڕێ ئەمریكا و ئیسرائیلێ دژی ئیرانێ ل 28ی شوباتا ئەڤ سالە، زێدەتر ژ شەش هزار هێرشان ل سەر هەرێما كوردستانێ هاتینە كرن، دووماهی هێرش ژی ڕۆژا دووشەمبییا بووری بوو كو تێدا نڤیسینگەها وی كرە ئارمانج.
هەروەسا دیاركر، ئەوان چ دەمان گەف ل ئاسایشا چ جیرانێن خۆ نەكریە، ئەو ب تنێ بزاڤێ دكەن، هەرێمێ ب ترسینن و ڕەنگە بكێشنە دناڤ هەڤركییێ، لێ ئەو ب توندی ب دژی ڤێ چەندێ ڕاوەستیاینە.
سەبارەت هندێ كو ئیران دبێژیت ئەو بەرپرسیار نینە، مەسرور بارزانی ئاشكراكر، ئەو درۆنێن بكارهاتین ژ جۆرێ حەدید توربوو یێن ئیرانی بوون و ژ ئیرانێ هاتبوون، پێدڤییە دەستهەلاتدارێن ئیرانێ ئەوێ چەندێ ڕوون بكەن، كا چەوا درۆنەك كو ل دەڤ چ كەسێن دی نینە، ژلایێ لایەنەكێ دیڤە دهێتە بكارئینان.
سەرۆكوەزیرێن هەرێما كوردستانێ دلگرانییا خۆ بەرامبەر ڤەكێشانا هێزێن ڕاهێنانان و پشتەڤانییا ئەمریكا و سیستەمێ بەرگرییا ئاسمانییا پاتریوت ل هەرێما كوردستانێ دەربری و گوت، هەتا نوكە نەهێلایە ئەو ببنە خۆدان سیستەمەكێ كارتێكەر كو وان ب پارێزیت، ڤەكێشانا ڤی سیستەمێ بەرگرییێ بێ گومان دێ وان ئێخیتە د مەترسییێ دا، ئەو داخوازێ ژ دوستێن خۆ دكەن د هاریكاربن بۆ بەردەستكرنا ئەڤان شیانان داكو بشێن بەرەڤانییێ ژ خۆ بكەن.