پشتی دەنگدانا پەرلەمانێ کوردستانێ ل سەر پۆستێ وەزیرێ سامانێن سروشتی، ئومێد خۆشناو سەرۆکێ فراکسیۆنا پارتی یا دیموکراتا کوردستانێ ئەڤرۆ چوارشەمبی ٦-١-٢٠٢١ێ د کۆنفرانسەکێ رۆژنامەڤانی دا دیار کر کو دانانا وەزێرێ سامانێن سروشتی پێنگاڤەکا باشە بۆ ب رێڤەبرنا کاروبارێن وێ وەزارەتێ و ستراتیژییا سیاسەتا نەفتا ھەرێما کوردستانێ.
ناڤھاتی گۆت ژی: بەری نوکە ژی لێژنەیێن پەرلەمانی ئاریشە ھەبوون ژ نەبوونا وەزیری، ئەڤە ژی پرکرنەک بوو ژ وێ ڤالاتییا د دەمێن بۆری دا ھەیی، ھیڤی خواست ژی کو پشتی دەست ب کاربوونا وەزیرێ سامانێن سروشتی ئەو بەرسڤا وان پرسیاران وەربگرن یێن کو د دوو سالێن بۆری دا ماینە ھەلاویستی.
ئومێد خۆشناو، ئەو چەندە ژی گۆت: وەک فراکسیۆنا پارتی، ئەم ھێزێن ئوپۆزسیۆنێ پشتراست دکەین، مە رێزەکا زۆر بۆ ھەڤپشکێن خۆ ھەیە، و ئەم وان وەک دوژمن نادانین و دڤێت ئەو ژی د وەسا بن و دەستھەلاتێ ژی ب داگیرکەر نەدانن،
دەربارەی ئەوان پێشھاتێن دناڤ پەرلەمانی دا رووداین، دووپاتکر کو ئەوا روودایی سیاسەتا پارتی نەبوو، ل سەر ئەوێ پێشھاتێ ژی حەفتییا داھاتی سەرۆکایەتییا پەرلەمانی دێ دگەل سەرۆکێن فراکسیۆنان کۆم بن.
دەربارەی بانگەشەیا پەرلەمانتارەکی کو ب خەنجەربۆکس ژ لایێ پەرلەمانتارەکێ پارتیڤە ھاتییە قوتان، ئومێد خۆشناوی گۆت: بەری نوکە ژی کارەکێ وەسا ھاتبوو کرن، و مە لیژنەکا پەرلەمانی دروست کر دەرکەفت ئەو راست نەبوو، ئەوا نوکە ژی چ راستی بۆ نینە.
