جڤاتا نیڤدەولەتییا ئاشتی و بەرھنگاریێ ژ بۆ مافێن مرۆڤی ئەفسەرەکێ پلە بلندێ وەزارەتا پێشمەرگەی وەکو بالیۆزێ نیڤدەولەتی یا ئاشتیێ ل سەر ئاستێ جیھانێ بۆ سالا ٢٠٢١ێ دیارکر.
وەزارەتا پێشمەرگەی یا حکومەتا ھەرێما کوردستانێ د ھژمارا خۆ یا فەرمی دا ل تۆرا جڤاکی یا فەیسبۆکێ بەلاڤکرییە: (عەمید سالح مهولود گهردى) پشتی کو پشکداری د کۆنگرەیێ ئاشتی یا نیڤ دەولەتی دا کری ل سالا ٢٠٢٠ێ و پشتی پێشکێشکرنا بابەتەکی ل سەر کۆمکوژییا رەگەزی و ئاینی د کۆنگرەی دا، دبیتە جھێ سەرنجا ئەندامێن سەرپەرشتیارێن کۆنگرەی و پاشی وەک بالیۆزێ نیڤ دەولەتیێ ئاشتیێ ل سەر ئاستێ جیھانێ بۆ سالا ٢٠٢١ێ دھێتەدیارکرن، ئەڤە ژی دەستکەفتەکێ مەعنەوی و یاساییە بۆ پێشمەرگێ کوردستانێ و کەسایەتییا ئەڤی ئەفسەرێ وەزارەتا پێشمەرگەی.
عەمید سالح مەولود گەردی ئەفسەرێ ھەماھەنگییە د ناڤبەرا وەزارەتا پێشمەرگەی و سەرۆکایەتییا ھەرێما کوردستانێ و سەرۆکایەتییا جڤاتا وەزیران، خەباتکەرە و خودان ھەلوێستەکێ نەتەوەیی یە، ھەروەسا خێزانا وی ژی ژلایێ رژێما بەعسڤە ھاتبوونە زیندان کرن و ل سالا ١٩٦٢ێ ل گرتیخانا قشلە یا ھەڤلێرێ ژ دایک بوویە، چەندین سالە ژی دناڤ رێزێن پێشمەرگەی دا خزمەتێ دکەت.
