پشکدارێن خولەکا ڕوژنامەڤانی سەرەدانا ناڤەندا خانی یا ڕەوشەنبیری و ڕاگەهاندنێ کر. ئێحسان ئامێدی بەرپرسێ گشتی یێ ناڤەندا خانی یا ڕەوشەنبیری و راگەهاندنێ، پێشوازی ل کۆمەکا کچێن ئێزدی یێن بەژدار د خولەکا ڕۆژنامەڤانی دا کر. د چارچوڤێ ڤێ سەرەدانا باس ل چەند تەوەران هاتە کرن ژ وان ژی گرنگیا کارێ روژنامەڤانی و پێکڤە ژیانا ئولی، تەوەرێ گرنگ یێ ناڤەروکێ شرۆڤەکرنا سەرەدەرییا کارێ ڕوژنامەڤانی د پێگەهاندن و خورتکرنا پەیوەندییان د ناڤبەرا ئایینێن جودادا و رێزگرتن ل بیر و باوەرێن ئول و پێکهاتەیان ل کوردستانێ هاتە کرن.
ژ لایەکێ دیڤە د سەرەدانا خوە دا ڤان قوتابیان سەرەدانا نیوزرۆما خانی نیوز ل هەمان ناڤەندێ کر و ژ لایێ بەرپرسێ سەرنڤیسەر “بەیار زاویتەی” ڤە هاتنە پێشوازی کرن و هەڤنیاسین د ناڤبەرا قوتابیێن خولێ و کارمەندێن خانی نیوز دا هاتە کرن.
سەرنڤیسەرێ خانی نیوز بەشێن نیوز رومێ و کارێ ڕوژانە یێ کارمەندان و پلانا رۆژانە بۆ وان قوتابیان شرۆڤە کر. بەژدارێن وێ خولێ ژ هەشت قوتابیێن کچ یێن ئێزدی کو ئاوارێن کەمپا خانكی بوون پێک هاتبوون، راهێنەرێن سەرپەرشت ژ ڤێ خولێ ، ژ (بێوار شوکری و حسێن ئیسماعیل) پێکهاتبوون، و ئەڤ خولە بو ماوێ چار حەفتیان ژ لایێ رێخراوا “فری ئێس دی” هاتبو رێکخستن.
