ئاهێن خوارنێ دێ ژ هژماره‌كا تەخ و چینان هێنە بڕین

جڤاتا وەزیرێن ئیراقێ د نڤیساره‌كێ دا راگه‌هاندییه‌، ئه‌و دێ ئاهێن خوارنێ ژ هژمارەكا تەخ و چینان بڕن و داخواز ژ وەزارەتێن پەیوەندیدار كرییه‌، ئەڤ بڕیارە، هه‌ر ژ رۆژا ئێكی خزیرانا ئەڤ سالە بهێتە بجهـ ئینان.

ل دووڤ وێ بریارا جڤاتا وه‌زیرێن ئیراقێ، ئاهێن خوارنێ دێ ژ شازده‌ تەخ و چینان هێنە برین و داخواز ژ وەزارەت و دەستەیێن پەیوەندیدار كرییه‌، د ده‌مێ 30 رۆژان دا ناڤێن وان كەسان رادەستی وەزارەتا بازرگانی بكەن، یێن كو مووچەیێ وان ژ ملیۆنەك و 500 هزار دیناران زێدەتر بیت.

هه‌روه‌سا جڤاتا وه‌زیران گۆتییه‌ ژى، ئه‌و دێ ئاهێن خوارنێ ژ ڤان تەخ و چینان برن، ئه‌و ژى خودان كۆمپانیێن تۆماركری، ئەوێن هەڤژینی نەكرین و مووچەیێ وان ملیۆنەك و 500 هزار دینار بیت، ئەوێن ل ژوورێن بازرگانی هەتا پلە دوو و ئەوێن ل ژوورێن پیشەسازی هەتا پلە سێ ئاهێن خوارنێ وه‌رناگرن، دیسان ئێكەتییا خودانكاران، نۆشداران، بەلێندەر هەتا یێن پلە شەش، نۆشدارێن ددانان و دەرمانساز، ئەوێن هژمارەكا زەریبی هەیین یێن سالانە 18 ملیۆن دینار زێدەتر باج ل سەر هەین، ئەوێن سێ هەیڤان سەرەدانا دەرڤە دكەن ب شێوه‌كێ بەروەخت دێ ژێ هێنە برین هەتا ڤه‌دگه‌رنه‌ وه‌لاتى، ئەوێن ئاكنجی ل ده‌رڤه‌ى وه‌لاتى.

هەروه‌سا دیار كرییه‌، ئاهێن خوارنێ دێ ژ ڤان ژى هێنە بڕین: ئەوێن رەگەزناما وەلاتەكێ دی هەین، ئەوێن زیندانكری هەتا دهێنە ئازاد كرن، مریێن ل ناڤ زیندانان، تیرۆرست، ئەوێن ژ دادگەهێ رەڤین و عەرەب و بیانی و پەنابەر، ژ بلی فەلەستینییان.