كه‌شناسییا جیهانى: ئه‌ڤساله‌ ل هه‌رێما كوردستانێ هشكه‌سالى نابیت و بارانه‌كا باش دێ باریت

ئه‌ڤرۆ 13ى كانوونا ئێكێ یا 2022ێ ژبه‌ر كارتێكرنێن ده‌ریا ناڤه‌راست، شه‌پۆله‌كا بارانبارینا ناڤنجى دێ به‌ر ب هه‌رێما كوردستانێ ڤه‌ هێت و په‌یڤدارێ وه‌زاره‌تا ڤه‌گوهاستن و گه‌هاندنێ ئاماژه‌ ب هندێ دا، ئه‌ڤ شه‌پۆله‌ دێ ب بارانێن كێم ده‌ستپێكه‌ت و دووڤدا هه‌تا راده‌یه‌كى رێژه‌یا بارانبارینێ دێ زێده‌بیت.

دیلان ره‌شاد په‌یڤدارێ وه‌زاره‌تا ڤه‌گوهاستن و گه‌هاندنێ ب پێگه‌هی فه‌رمى یێ حكومه‌تا هه‌رێما كوردستانێ راگه‌هاندییه‌، نوكه‌ ل ده‌ڤه‌رێن چیایى به‌فربارینێ ده‌ستپێكرییه‌ و پله‌یێن گه‌رمێ نزمبووینه‌ و سه‌قا ب گشتى ل ئاسمانێ هه‌رێما كوردستانێ ئه‌وره‌ و هه‌وایه‌كێ سار به‌ر ب ده‌ڤه‌رێ دهێت، ئه‌ڤ شه‌پۆله‌ دێ بۆ ده‌مه‌كێ درێژ مینیت و هه‌تا رۆژا پێنجشه‌مبى یا به‌رده‌وامبیت.

گوت ژى: ژ ئه‌نجامێ كارتێكرنا ئه‌ڤێ شه‌پۆلا بارانبارینێ، چاڤه‌رێ ناهێته‌كرن لافاو ل ده‌ڤه‌رێن هه‌رێما كوردستانێ رووبده‌ن.

سه‌باره‌ت مه‌ترسیین هشكه‌سالییێ كو ل دوو سالێن بوورى هه‌رێما كوردستانێ گرتییه‌، په‌یڤدارێ وه‌زاره‌تا ڤه‌گوهاستن و گه‌هاندنێ راگه‌هاند، ل دووڤ هه‌موو راپۆرتێن رێكخراوا كه‌شناسییا جیهانى و ئه‌زموونا شاره‌زایان و راپۆرتا رێكخراوا كه‌شناسییێ، پێشبینى ناهێته‌كرن ئه‌ڤ ساله‌ هشكه‌سالى رووبده‌ت، به‌رۆڤاژى وێ ئه‌ڤ ساله‌ رێژه‌یا بارانبارینێ دێ گه‌له‌ك یا باش بیت، هه‌ر ل دووڤ پێشبینییان، پشتى وه‌رزێ زڤستانێژى بهاره‌كا باراناوى دێ هێت و باران دێ یا به‌رده‌وامبیت.