سەرۆکایەتییا هەرێما کوردستانێ د بەیاننامەیەکێ دا ڕاگەهاندیە،” پێدڤییا مە ب ئێکگرتن و هەڤکارییا دناڤبەرا هەمی لایەنان دا هەیە، ب تایبەت ژی پارتی دیموکراتی کوردستان و ئێکەتی نیشتیمانی کوردستان کو پێکڤە داهاتوویێ ڤێ هەرێمێ د دەستێن وان دایە.”
دەقێ بەیاننامێ:
سەرۆکایەتییا هەرێما کوردستانێ پێشوازی ل دوماهی شاندێ حکومی یێ وەلاتێن ئێکگرتی یێن ئەمریکا ب سەرۆکایرتییا بەرێز برێت مەکگورک، هنارتییێ سەرۆکێ ئەمریکا بۆ کارو بارێن ڕۆژهەلاتا ناڤەڕاست و باکوورێ ئەفریقیا ب هەڤبەشییا بەرێز ئامۆس هۆکستاین، هنارتییێ سەرۆکایەتییا ئەمریکا بۆ ژێرخانا جیهانی و ئاسایشا وزەیێ دکەت.
ئەم پێگیری و پشتەڤانییا خۆ بۆ پەیوەندییێن دوو لایەنانە یێن بهێز و بەرهەمدار یێن عیراق و هەرێما کوردستانێ دگەل حکومەتا وەلاتێن ئێکگرتی لسەر بنەمایێ ڕێککەفتنا چوارچوڤێ ستڕاتیژی دوپات دکەین.
ئەڤرۆ زێدەتری هەر دەمەکی، هەرێما کوردستانێ د ڕەوشەکا نە ڕۆهن و کێشەیان دایە، پێدڤییا مە ب ئێکگرتن و هەڤکارییا دناڤبەرا هەمی لایەنان دا هەیە، ب تایبەت ژی پارتی دیموکراتی کوردستان و ئێکەتی نیشتیمانی کوردستان کو پێکڤە داهاتوویێ ڤێ هەرێمێ د دەستێن وان دایە.
داخوازێ ژ گشت هێزێن سیاسی دکەین کو جوداهییێن خۆ بدەنە لایەکی و ب سینگەکێ فرەهــ ئاریشەیێن خۆ ب ڕێکا گوتوبێژ و لێکتێگەهشتنێ چارەسەر بکەن.
ئەوا مە کۆمدکەت گەلەک مەزنترە ژ وێ یا کو مە ژێک جودا دکەت، ژ بۆ بشێین ئارامی و ئێکڕێزییێ بنەجهــ بکەین، ژ بۆ هندێ بشێین بەڕژەوەندییێن وەلاتییێن هەرێما کوردستانێ بپارێزین و پێشڤە ببەین، پێدڤییە ئەم هەمی ب بەرپرسیارانە پێنگاڤێن خۆ بهاڤێژین.
هەڤدەم پێشوازیێ ل بەرەڤ پێشڤەچوونێن بەردەوام یێن چارەسەریا ئاریشەیێن دناڤبەرا حکومەتا فیدڕال یا عیراقێ و حکومەتا هەرێما کوردستانێ دا دکەین، سەرەڕای بارگرانییێن بووری، ئەم د گەشبینین کو دشێین دگەل سەرۆکوەزیرێن بەرێز معەمەد شیاع سوودانی و کابینەیا وی د چوارچوڤێ دەستوورێ عیراقێ دا، ئاریشێن هەلاویستی چارەسەر بکەین.
