سەرۆکێ پەیمانگەها ڤەکۆلینێن ئەمریکی – کوردی: نەفت بوویە فاکتەرەکێ گرنگ بۆ مان و پێشکەفتنا هەرێما کوردستانێ د هەڤکێشێن دەڤەرێ و نێڤدەولەتی دا

 ئاژانسا خانی، زنار تۆڤی:

کارۆخ خۆشناو، سەرۆکێ پەیمانگەها ڤەکۆلینێن ئەمریکی – کوردی بۆ ئاژانسا خانی دیار کر: نەفت وەکو ژێدەرەکێ سروشتی و سامانەکێ گرنگێ نەتەوەیی و نیشتیمانی ل سەر ئاستێ جیهانیدا گرنگیەکا تایبەت پێ دهێتەدان، چونکی ئەڤ ژێدەرێ سروشتی دبیتە داینەمۆیێ پێشکەفتن و خۆشکرنا ژیارا وەلاتییان، ب مەرجەکێ ب رێیا عەقلەکێ هەڤچەرخ و وەبەرهێنان دڤی سامانێ نیشتیمانیدا بهێتە کرن.

 ناڤهاتی گۆت ژی: ل دەستپێکا دروستبوونا دەولەتا عێراقێ، دەمێ نەفت هاتییە دیتن، ئەڤ ژێدەرە ل جهێ هندێ ببیتە نیعمەت بوویە بەلەنگازی، چونکی دەستهەلاتدارێن بەغدا ب رێیا داهاتێ نەفتێ چەندین چەکێن کۆمەلکوژ و تانک و فرۆکێن شەری پێ کرینە و ل سەر ئاخ و خەلکێ کوردستانێ تاقی کرینە، لەوما ل سەدێ بوری نەفت بۆ کوردستانێ وەکو بەخت رەشییێ هاتییە دیتن نەکو زێرێ رەش!

کارۆخ دبێژیت ژی: هەکە چاڤخشاندنەکێ د مێژوویا وەلاتێن پێشکەفتی یێن خودان یەدەکێ نەفتێ دا بکەین، دێ بینین ئەڤ ژێدەرێ گرنگ هەڤشێوێ زێرێ رەش بوویە نیعمەتەکێ مەزن بۆ زێدەکرنا ئاڤەدانییێ و خۆشکرنا ژیارا وەلاتان، بۆ نموونە دەمێ نەفت ل دەستپێکا سالێن شێستان، ل سەدێ بوری ل نەرویج هاتییە دیتن دبیتە نیعمەتەکێ مەزن بۆ وی وەلاتی و ل سالا 1990 ێ، پەرلەمانێ نەرویج بریار دا سندوقا سیادی دابمەزرینیت، داهاتێ وێ سندوقێ ل سالا 1998 ێ گەهشتە 23 ملیار دۆلاران، لەوما پەرلەمانێ نەرویج بریار دا وەبەرهێنانێ د وی پارەیی دا بکەت، پشتی 20 سالان وەبەرهێنان ب رێیا نەھ هزار کۆمپانییان ل 74 وەلاتان دا کری، سندوقا سیادی یا نەرویجی دبیتە خودانا ( ئێک ترلیۆن و نیڤ) دۆلاران، ئەو پارە ب رێیا وەبەرهێنانێ زێدە کرییە، ب جۆرەکێ ئەگەر بهێتە دابەش کرن ب سەر هەموو وەلاتی یێن (نەرویج) دا کو هژمارا وان نێزیکی پێنج ملیۆن کەسانە، هەر وەلاتییەک دێ چـارێک ملیۆن دولار گەهنێ!، بەلێ خەلکێ کوردستانێ ب سایا رژێما دکتاتۆر یا بەغدا و ب رێیا فرۆشتنا نەفتێ و کرینا چەکی، کو هەر خێزانەکا کوردستانی ( ژ بلی جارەک مالوێرانییێ و کاڤلکرنا گوندان و پڕۆسا ئەنفال و کێمیابارانێ) دشێین بێژین هەر مالەکێ شەهیدەک یان پتر بەردکەڤیت!.

ناڤهاتی ئەو چەند ژی گۆت: نوکە هەرێم و بەغدا گەهشتینە رێککەفتنەکا هەڤسەنگ بۆ برێڤەبرنا دۆسیەیا نەفتێ، دبیت هەردەم چاڤێ مە ل  سەر مێژوویێ بیت داکو ئێدی نەفت نەبیتە بەلەنگازی بۆ خەلک و ئاخا کوردستانێ، هەروەسا هەکە ئەم بێژین، د چەند سالێن بوری دا برێڤەبرنا دۆسیەیا نەفتێ ژلایێ هەرێمێ ڤە بێ کێماسی نەبوویە، بەلێ ئەڤ دۆسیەیە فاکتەرەکێ گرنگ بوویە بۆ مان و پێشکەفتنا هەرێما کوردستانێ د هەڤکێشێن دەڤەرێ و نێڤدەولەتی دا، ب تایبەتی پێگەهەکێ گرنگ بۆ هەرێمێ دروستکرییە ل سەر نەخشێ وزەیا جیهانی، لەوما ئەڤ پرسە ل دەمێ بوری و نوکە و د داهاتی دا پشکەکا ڤەنەقەتیایە ژ ئاسایشا نەتەوەیی و نیشتیمانی یا کوردستانێ، دیسان دڤێت پێداچوونەکا زێدەتر د دۆسیەیا نەفتێ دا بکەین و مفایی ژ ئەزموونا وەلاتێن وەکو نەرویج وەربگرین، داکو ب رێیا برێڤەبرنەکا ژیرانە و شەفاف و هەڤچەرخ، بشێین داهاتێ نەفتێ بێخینە د خزمەتا ئاخێ و خەلکێ  کوردستانێ دا، هەروەسا دڤێت پەند و عیبرەتان ژ دەمێ بوری وەربگرین و نابیت ب چ رەنگان ڤێ دۆسیەیێ ب تەمامی رادەستی بەغدا بکەین.