ل ھزار و 200 جھان داشکاندن دێ بۆ مامۆستایان ھێتە کرن

ئاژانسا خانی ” تایبەت:

سەرۆکێ ئێکەتییا مامۆستایێن کوردستانێ ئاشکرا کر، ئێکەتیا مامۆستایان رێکكەفتن ل گەل بانکەکێ کرییە و ھەر مامۆستایەکێ کارتا ئەوێ بانکێ چێکەت دێ مفادار بیت ل داشکاندنێ ل ھزار و 200 جھێن بازرگانی و چەندین خزمەتگوزاری یێن دی ژی ھەنە.

ئەحمەد گەرمیانی، زێده‌تر بۆ ئاژانسا خانی دیارکر” ئێکەتییا مامۆستایان هه‌ڤبەستەک ل گەل بانکا FIB  ئیمزا کرییە و ھەر مامۆستایەکێ ببیتە خودانێ کارتا ئەوێ بانکێ دێ مفادار بیت، چونکی چێکرنا ئەوێ کارتێ بۆ وەلاتییان 33 ھزار دینارن، بەلێ بۆ مامۆستایان ب تنێ 11 ھزار دینارن و ھەر مامۆستایەکێ پشتەڤانییا ئێکەتییا مامۆستایان ھەبیت” دشێت مفاداربیت ل دەرکرنا ئەوێ کارتێ.

ئەحمەد گەرمیانی گۆت ژی” ئەو کەسێن خودانێ ئەوێ کارتێ بن دێ مفادار بن ل داشکانا پتری ھزار و ٢٠٠ جھێن بازرگانی ل سەرانسەری ھەرێما کوردستانێ ب رێژا ١٠%ێ، ھەروەسا ھەر قەڕەکێ ئەو بانکە بدەت دێ کەسێن ئەو کارتە ھەین مفادار بن، ژلایەکێ دیڤە ڤەگۆھاستنا پارەیی ل ئەوێ بانکێ بۆ لقێن بانکێ بێی بەرامبەرە، چەندین ئۆڤەرێن دی ژی ھەنە ژ وان ڤەگۆھاستنا پارەیی بۆ ھەر بانکەکێ ئەگەر ژ ملیۆنەکێ کێمتر بیت بێی بەرامبەرە.