ئه‌ڤرۆ چارشه‌مبی 20 ی كانوونا ئێكێ 2023 ێ” كۆمبوونا جڤاتا وه‌زیرێن هه‌رێما كوردستانێ ب سه‌رپه‌رشتییا سه‌رۆكوه‌زیران مه‌سرور بارزانى هاته ئه‌نجامدان و لدووڤ به‌یانه‌كا سه‌رۆكێ حكومه‌تێ “د برگا ئێكێ یا كۆمبوونێ دا، دووماهی پێشهاتێن هه‌ردو دوسیه‌یێن هه‌مواركرنا یاسایا بودجه‌یێ فیدرالى و یاسایا نه‌فت و گازێ ژ لایێ وه‌زیرێن په‌یوه‌ندیدار ڤه هاته به‌حسكرن.
هه‌روه‌سا دیار كرییه” بزاڤ بۆ هه‌مواركرنا یاسایا بودجه‌یێ گشتییێ فیدرالى د به‌رده‌وامن هه‌تاكو دهێته ره‌وانه‌كرن بۆ جڤاتا نوونه‌ران بۆ په‌سه‌ندكرنێ ب ئاراسته‌یا خه‌رجكرنا شایسته‌یێن دارایى یێن هه‌رێما كوردستانێ و به‌رى هه‌موویان ژى شایسته‌یێن فه‌رمانبه‌رێن هه‌رێما كوردستانێ، دیسان هه‌رێما كوردستانێ پێگیرییێن خۆ بجهئیناینه و هه‌ردو دیوانێن چاڤدێرییا دارایى ئه‌ركێن هووربینییێ و پێداچوونێ ته‌مامكرینه و هه‌رێما كوردستانێ ژ ڤى روویى ڤه ئاسانكارییێن ته‌مام پێشكێشكرینه”.
ئه‌و ژی گۆتییه “جڤاتا وه‌زیرێن هه‌رێمێ ته‌كه‌زی ل سه‌ر هندێ كرییه كو مووچه‌یێن فه‌رمانبه‌رێن هه‌رێمێ مافێ فه‌رمانبه‌رانه، ئه‌م چاڤه‌رێ دكه‌ین ژ حكومه‌تا فیدرالى ل سالا نوو دا ڤێ كێشێ ژ بنه‌ره‌تی چاره‌سه‌ر بكه‌ت و شایسته‌یێن دارایى یێن فه‌رمانبه‌ران تێكه‌لى ناكۆكیێن سیاسى و پێگیریێن دى نه‌كه‌ت و فه‌رمانبه‌رێن هه‌رێما كوردستانێ ژى وه‌كى یێن ده‌ڤه‌رێن دى یێن عیراقێ مووچه‌یێن خۆ د ده‌مێ خۆ دا وه‌ربگرن” د نوكه دا ژبه‌ر نه‌هنارتنا پشكا بودجه‌یێ هه‌رێمێ، مووچه‌یێن سێ هه‌یڤان یێن ئه‌ڤ ساله نه‌هاتینه خه‌رجكرن و بارگڕانییا دارایى و ئابوورى بۆ فه‌رمانبه‌ر و وه‌لاتییێن هه‌رێمێ دروستبوویه كو به‌رپرسیارا حكومه‌تا فیدرالییه مووچه‌یێن فه‌رمانبه‌ران بۆ حكومه‌تا هه‌رێما كوردستانێ بهنێریت”.
برگا دووێ یا وێ كۆمبوونێ، ماده و برگه‌یێن ره‌شنڤیسا ئێكێ (رێنمایێن كاركرنا كرێكارێن بیانى ل هه‌رێما كوردستانێ هاتنه به‌حسكرن كو ژ لایێ دارا ره‌شید وه‌زیرێ پلاندانانێ ڤه هاتنه به‌حسكرن و گۆت” ئارمانج ژ ڤان رێنمایان رێكخستنا مۆله‌تا كارى و ڤیزه و ئاكنجیبوونه و رێگرییه ل هاتنا كرێكارێن بیانى ب شێوێ نه‌یاسایى و په‌یداكرنا پتر یا ده‌لیڤێن كارییه بۆ گه‌نجێن هه‌رێما كوردستانێ ب شێوه‌كێ كو خۆدانێن كۆمپانییان پتر به‌رێ خۆ بده‌نه كرێكار و كارمه‌ندیێن ناڤخۆیی، هه‌روه‌سا پشتراستییێ بده‌ته مانا كرێكارێن بیانى ژى ل هه‌رێمێ داكو هه‌رێما كوردستانێ مفایى ژ ئه‌زموون و شاره‌زاییا وان وه‌ربگریت.
عه‌بدوللا حاجى مه‌حموود” وه‌زیرێ كاروبارێن شه‌هیدان و ئه‌نفالكرییان چه‌ند پێشنیاره‌ك بۆ جڤاتا وه‌زیران دیاركرن كو تایبه‌ت بوون ب زیندانی و گرتیێن سیاسى لدووڤ شایسته‌یێن یاسایى یێن دیاركرى یێن وان بۆ گره‌نتیكرنا ماف و شایسته‌یێن وان یێن ژ هه‌ژى و رێگرتنێ ل مفاداربوونا نه‌ره‌وا ژ مووچه و ئیمتیازاتێن گرتیان و زیندانیێن سیاسى ئه‌ڤ چه‌نده لدووڤ حوكمێن په‌یره‌وێ ژماره 4 ل سالا 2020 ێ” یێ تایبه‌ت ب ئاسانكارییان بۆ بجهئینانا یاسایا چاكسازییێ”.
جڤاتا وه‌زیران ئه‌و پێشنیاره په‌سه‌ندكرن و وه‌زاره‌ت راسپارد كو د بزاڤێن خۆ دا ل گه‌ل نوونه‌رایه‌تییا هه‌رێما كوردستانێ ل به‌غدا د به‌رده‌وام بن ب پابه‌ندكرنا حكومه‌تا فیدرالى ب دابینكرنا مووچه و ئیمتیازێن زیندانیان و گرتییێن سیاسى ژ لایێ حكومه‌تا فیدرالى لدووڤ مادێ 132 ژ ده‌ستوورێ عیراقێ كو ئه‌ڤ به‌رپرسیارییه د ستوویێ حكومه‌تا عیراقێ دایه”.
