ئاریشه‌یا مووچه‌یێ دوو هه‌یڤێن خانه‌نشینێن هێزێن یه‌كه‌یا ( 70 )ێ هاته‌ چاره‌سه‌ركرن

ئاوات شێخ جه‌ناب وه‌زیرێ دارایى و ئابوورى پێشوازى ل ژماره‌كا نوونه‌رێن خانه‌نشینێن هێزێن یه‌كه‌یا (70 )ێ كر كو ژ چه‌ند ده‌ڤه‌رێن جۆدا یێن پارێزگه‌ها سلێمانییێ سه‌ره‌دان كربوو.
د دیدارا واندا دانوستاندن ل سه‌ر ئاریشه‌یا مووچه‌یێ خانه‌نشینێن هێزێن یه‌كه‌یا ( 70 )ێ هاته‌كرن، كو ژمارا وان زێده‌تر ژ نه‌هـ هزار كه‌سایه‌ و مووچه‌یێ وانژ نێزیكى ( 4 ) ملیار دینارایه‌ و هه‌تا نوكه‌ نه‌ئێخستینه‌ سه‌ر ڕێڤه‌به‌رییا گشتییا خانه‌نشینان ل وه‌زارتا دارایى و ئابوورى.
وه‌زیرێ دارایى دیاركر، ل دووڤ قانوونا چاكسازییێ و ڕاپۆرتا تیما هه‌ڤپشك یا دیوانا چاڤدێرییا دارایى، نابیت چ خانه‌نشین ژ ده‌رڤه‌ى ڕێڤه‌به‌رییا گشتیییا خانه‌نشینییا وه‌زاره‌تا دارایى مووچه‌ى وه‌ربگرن، لێ خانه‌نشینێن هێزێن یه‌كه‌یا ( 70 )ێ هه‌تا نوكه‌ چ داتا و زانیارى و كه‌یسێن وان ل ڕێڤه‌به‌رییا گشتییا ژمێركارى و ڕێڤه‌به‌رییا گشتییا خانه‌نشینییا وه‌زاره‌تا دارایى و ئابوورى نینن، ل وه‌زاره‌تا داراییا عیراقێ و وه‌زاره‌تا داراییا هه‌رێما كوردستانێ ژى چ ته‌رخانكرنه‌ك بۆ داراییا وان نه‌هاتییه‌ كرن.
گوت ژى: وه‌زاره‌تا دارایى به‌رپرسیا نینه‌ ژ گیروبوون و نه‌دانا مووچه‌یێ وان، به‌لكو پێدڤییه‌ فه‌رمانده‌یێ هێزێن یه‌كه‌یا ( 70 )ێ كاربكه‌ت كو ب زووترین كه‌یسێن وان ڤه‌گۆهێزیته‌ سه‌ر ڕێڤه‌به‌رییا گشتییا خانه‌نشینان ل وه‌زاره‌تا دارایى و ئابوورییا هه‌رێما كوردستانێ، هه‌ڤشێوه‌یێ هه‌یڤێن دى وه‌زیرێ دارایى فه‌رمانكر مووچه‌یێ هه‌یڤێن گۆلان و خزیرانێ یێ خانه‌نشینێن هێزێن یه‌كه‌یا ( 70 )ێ ب شێوه‌یێ سلفه‌ بهێته‌ خه‌رجكرن، هه‌تاكو ئاریشه‌ ب ئێكجارى بهێته‌ چاره‌سه‌ركرن.