د هه‌یڤا ڕه‌مه‌زانێدا خوارن و ڤه‌خوارن ب ئاشكه‌رایی قه‌ده‌غه‌نه‌

ب هەلکەفتا هاتنا هەیڤا ڕەمەزانێ، وەزارەتا ناڤخۆیا عێراقێ ڕاگه‌هاندنه‌ك بەلاڤکر و داخواز ژ هەموو وەلاتی و ئاکنجییێن عێراقێ کر کو پابەندبن ب ڕێزگرتنێ ل ڤێ هەیڤا پیرۆز و تایبەتمەندییا وێ ب پارێزن.

وەزارەتا ناڤخۆیا عێراقێ چه‌ند ڕێنما به‌لاڤكرن و دیاركر، خوارن و ڤەخوارنا ئاشکەرا د دەمێ رۆژیێدا قه‌ده‌غه‌نه‌ و دبیته‌ بێڕێزی بەرامبەر هەستێن كه‌سانێن ڕۆژیگر، بازرگانیکرن یان پێشکێشکرنا هەموو جورێن ڤەخوارنێن کحولی د ڤێ هەیڤێدا ب تەمامی قەدەغەنه.

وەزارەتا ناڤخۆ ڕاگەهاند، ب هەماهەنگی دگەل وەزارەتێن دی و حکومەتێن خۆجهی ل هەموو پارێزگەهان دێ چاڤدێرییا بجهئینانا ڤان بڕیاران کەت، هەر کەسێ سەرپێچیێ بکەت، دێ هێتە سزادان ب ڤی رەنگی؛

* وەلاتیێن عێراقێ، ل دویڤ ماددەیا 1 ژ قانوونا وەزارەتا ناڤخۆ ژمارە 20 یا سالا 2016ـێ، و بڕگەیێن (2 و 3) ژ هەمان قانوون، سزایێن قانوونی دێ ب سەردا هێنە سەپاندن.

* بیانی و کرێکارێن دەرڤە ،هەر پێشێلکارییەك دێ بیتە ئەگەرێ سزادانێ و ڕەنگە بگەهیتە ئاستێ قەدەغەکرنا کارکرنێ یان دەرئێخستنێ (تەسفیرکرنێ) ژ عێراقێ.