بڕیارە ئاکپارتی ب سەرۆکاتیا سەرۆککۆمارێ تورکیا کۆمببیت بۆ گەنگەشەکرنا پرسا قەدەغەکرنا سۆشیال میدیایێ ل سەر زارۆکان و رێگریکرن ل توندوتیژیێن د ناڤ قوتابخانان دا.
سوبەهی سێشەمبی، 28ی نیسانا 2026، جڤاتا ناڤەندییا بڕیاردانا پارتا داد و گەشەپێدانێ (ئاکپارتی) ب سەرۆکاتیا رەجەب تەیب ئەردۆغان، سەرۆککۆمارێ تورکیا کۆمببیت.
گەنگەشەکرنا هێرشێن چەکداری یێن ڤێ دووماهییێ د ناڤ قوتابخانێن پارێزگەهێن رۆها و مەڕەش دا ل باکورێ کوردستانێ، دهێتە چاڤەڕێکرن کو بەرپرسێن پارتێ ڕاپۆرتەکا هویر ل سەر ئەگەرێن وان توندوتیژیان پێشکێش بکەن.
هەلسەنگاندن بۆ بڕیارا دابینکرنا دو پۆلیسان بۆ هەر قوتابخانەیەکێ دێ هێتە کرن، کو ئەڤ بڕیارە حەفتیا بوری چوویە د واری بجهئینانێ دا.
پرسەکا دی یا گرنگ، پرۆژەیاسایا سنوردارکرنا سۆشیال میدیایێ یە بۆ زارۆکێن ژییێ وان ل بن 15 سالیێ دا.
د کۆمبوونێ دا دێ بەحسێ میکانیزمێن سەلماندنا عەمری، ژێبرنا ب لەز یا ناڤەرۆکێن زیانبەخش، و دانانا سنوران بۆ یاریێن ئەلیکترۆنی هێتە کرن، ب مەرەما پاراستنا نڤشێ نوو ژ مەترسیێن دیجیتالی.