پشتی ب دووماهی هاتنا دەمێ یاسایی یێ 15 ڕۆژی، کو دەستووری بۆ سەرۆککۆماری دیار کربوو داکو کاندیدەکێ بۆ سەرۆکاتیا جڤاتا وەزیران ڕابسپێریت، عێراق ب فەرمی چوویە د ناڤ رەوشا ڤالاهییا دەستووری دا. ئەڤ بنبەستا سیاسی پشتی وێ چەندێ دهێت کو لایەن نەشیان ل سەر ناڤەکێ ڕێکبکەڤن.
ئەڤڕۆ دوشەمبی، 27ی نیسانا 2026، پشتی تەمامبوونا دەمێ دەستووری، چارچووڤێ هەماهەنگییێ کو مەزنترین کوتلەیا پەرلەمانییە، نەشیایە بڕیارەکا ئێکلاکەر بدەت” ئەگەرێ ڤێ چەندێ ژی بۆ جوداهیا دیتنا بالێن ناڤ چارچووڤەیی دزڤڕیت، پشکەک پێداگیریێ ل سەر کاندیدکرنا سەرکردێن هێلا ئێکێ وەک نوری مالیکی دکەن.
بالەکێ دی یێ ناڤ چارچووڤێ ژ کارڤەدانێن نێڤدەولەتی و نەرازیبوونێن جەماوەری دترسن و داخوازا کاندیدەکێ “سازانێ” دکەن.
ڤیتۆیا ترەمپی و ترسا ئابۆری
هەلویستێ توندێ دۆنالد ترەمپی، سەرۆکێ ئەمریکا، مەزنترین بەربەستە ل هەمبەر کاندیدکرنا نوری مالکی” واشنتۆن ب ڕێکا “بانکا فیدراڵی” کۆنترۆلا داهاتێ نەفتا عێراقێ و ڤەگوهاستنا دۆلاری دکەت.
هەر سەرۆکوەزیرەکێ بکەڤیتە بن ڤیتۆیا ئەمریکا، ڕەنگە عێراق ڕووبڕوو ئابلۆقا دارایی و کێشەیێن بودجەیی ببیت و مەترسی ل سەر پاشڤەکێشانا هاریکاریێن سەربازی و هەوالگێری هەیە.

کاندیدێن دیار بۆ دەربازبوون ژ قەیرانێ:
نوکە چەند ناڤەک هەنە بۆ وەرگرتنا ڤی پۆستی:
باسم بەدری: کاندیدێ سازانێ یە و مالکی پشتەڤانیا وی دکەت.
محەمەد شیاع سوودانی: سەرۆکوەزیرێن نوکە، کو هێشتا وەک بژاردەیەکا ب هێز بۆ خولا دویێ دهێتە دیتن.
حەیدەر عەبادی، قاسم ئەعرەجی و محەمەد ساحیب دەڕاجی: وەک کاندیدێن دەمژمێرێن دووماهییێ دهێنە دیتن کو ڕەنگە ل ئاستێ نێڤدەولەتی قەبوولکرى بن.