یانا ئامەد سپۆرا باکورێ کوردستانێ، ب تنێ ئێک یاری بەری ب دووماهی هاتنا ڤی وەرزی ژ خولا پلە ئێک یا تورکیا مایە، بڕیارا دەركرنا ڕاهێنەرێ خۆ دا و ب ڕاهێنەرەکێ کورد دخوازیت بگەهیتە سۆپەرلیگا توركی.
پشتی وەكهەڤبوونا وان ل گەل یانا “بۆدرووم” ل گەڕا بەری دووماهییێ ژ خولێ دا ب گۆلەکێ بۆ هەر لایەکێ، یانەیا ئامەد سپۆر کۆمبوونەک دگەل مەسعوود بەقال، ڕاهێنەرێ یانێ ئەنجامدا، پشتی وێ کۆمبوونێ، هەردو لایان ب ڕێککەفتن بڕیار دا کو گرێبەستا د ناڤبەرا وان دا ب دووماهی بینن و وی ڕاهێنەری مالئاڤاهی ل یانا ئامەسپۆر کر.
پشتی چەند دەمژمێرەکێن کێم ژ هەلوەشاندنا گرێبەستا مەسعود بەقالی، ب فەرمی ناڤێ سەرتاچ کوچوکبایراک وەکو ڕاهێنەرێ نوو یێ ئامەد سپۆرێ هاتە ڕاگەهاندن.
سەرتاچ کوچوکبایراک کییە؟
ل سالا 1974 ژ دایک بوویە، خەلکێ باژێرێ ڕوها یێ باکورێ کوردستانێ یە و کوردە، نوکە ژییێ وی 52 سالن.
بەری نوکە د تیپا ژێر 21 سالی یا یانا دیاربەکر سپۆرێ دا دەست ب یاریکرنێ کرییە و د تیپا ئێکێ یا وێ یانێ دا ژی یاری کرییە.
یاریزانێ یانا سێرت بوویە، ل یانێن ئەنتالیاسپۆر، کۆنیا ئەندوستری، مۆبەلاسپۆر و باتمان پەترۆلسپۆر یاری کرییە.
ل سالا 2008 دەست ب کارێ ڕاهێنەرایەتییێ کرییە و ل یانا “دیسکیسپۆر” بوویە هاریکارێ ڕاهێنەری.
پشتی دو سالان پەیوەندی ب یانەیا دیاربەکر کرییە و بوویە ڕاهێنەرێ تیپا دویێ یا وێ یانێ.