ئیماراتێ ڤەکێشانا خۆ ژ هەڤپەیمانیا ئۆپێک و ئۆپێک پلەس ڕاگەهاند و گۆت، دێ بەردەوام بیت ل سەر زێدەکرنا رێژا بەرهەمئینانا نەفتێ ب شێوەکێ “بەرەبەرە و پلان بۆ دارێژتی.
ئەڤڕۆ سێشەمبی، 28ی نیسانا 2026، دەولەتا ئیماراتێ ب فەرمی بڕیارا خۆ بۆ ڤەکێشانێ ژ ڕێکخراوا وەڵاتێن هناردەکارێن نەفتێ (ئۆپێک) و هەڤپەیمانیا “ئۆپێک پلەس” ڕاگەهاند” ئەڤ بڕیارە دێ ل دەستپێکا مەها گولانا بهێت کەڤیتە د وارێ بجهئینانێ دا.
ل دویڤ ڕاگەهاندنەکا فەرمی کو ئاژانسا نووچان یا ئیماراتێ (وام) بەلاڤکرییە، ئەڤ بڕیارا دەولەتا ئیماراتێ پشتی پێداچوونەکا هویر و گشتگیر بۆ سیاسەتا بەرهەمئینانا وەڵاتی و هەڵسەنگاندنا شیانێن نوکە و پاشەڕۆژێ هاتییە.
هەروەسا ئەڤ پێنگاڤە ژ پێخەمەت پاراستنا “بەرژەوەندییێن نیشتمانی” هاتیە هاڤێتن، ئیمارات پێگیرە ب ڕۆلێ خۆ یێ بەرپرسیارانە د دابینکرنا پێدڤییێن بازاڕێ وزێ دا و دێ بەردەوام بیت ل سەر زێدەکرنا ڕێژا بەرهەمئینانا نەفتێ ب شێوەکێ “بەرەبەرە و پلان بۆ دارێژتی”، ب جۆرەکێ کو دگەل ئاستێ خواست و رەوشا بازاڕێ جیهانی دا بگونجیت.
ل دویڤ بڕیارێ، ڕۆژا 1ی گولانا 2026 وەک دەمێ دووماهییێ و فەرمی بۆ ڤەکێشانا ئیماراتێ ژ وێ ڕێکخراوێ هاتیە دیارکرن، ئەڤە ژی وەک گوهۆڕینەکا گرنگ د سیاسەتا نەفتێ یا وی وەڵاتی و نەخشێ وزێ یێ جیهانی دا دهێتە هژمارتن.