مەسرور بارزانی: پارێ پێدڤی بۆ دابەشکرنا مووچێ مه‌ها شواتێ هاتییه‌ دابینکرن

جڤاتا وەزیران ب توندی هێرشا سەر وه‌لاتی یێن هەولێرێ شه‌رمزار دكه‌ت و داخوازا پێکئینانا لیژنەكا نێڤدەولەتی دكه‌ت بۆ دەرخستنا راستییان و رەتکرنا تۆهمەتان

ئەڤرۆ چارشه‌مبی” ب سەرپەرشتییا مەسرور بارزانی سەرۆکێ جڤاتا وەزیران و ب ئامادەبوونا قوباد تالەبانی جێگرێ سەرۆکێ جڤاتا وه‌زیران  کۆمبوو.

برگا ئێكێ یا وێ کۆمبوونێ یا تایبەت بوو ب بلند راگرتنا بیره‌وه‌رییا 34 سالییا جینۆسایدا کیمیا بارانکرنا هەلەبجە، ژ لایێ ئامانج رەحیمی سکرتێرێ جڤاتا وەزیران ، ژمارەكا پێشنیار و داخوازیێن پارێزگه‌ها هەلەبجە خستنه‌ به‌رچاڤ د وارێن جۆدا دا تەمامکرنا هەیکەلیەتێ ئیدارا پارێزگه‌هێ و پڕکرنا پێدڤیێن میلاکی و دامەزراندنێ بۆ فەرمانگەهـ و رێڤەبەریێن گشتی و بودجێ وێ پارێزگه‌هێ و پڕۆژێن خزمەتگوزاری یێن گشتی و ئاڤەدانکرنا هەلەبجە و پێکئینانا جڤاتا پارێزگه‌هێ و پێدانا تایبەتمەندیێ ب وێ پارێزگه‌هێ ژ ڕوویێ ئیداری و دارایی وەکو پارێزگه‌ها نوو، هەروەسا بابەتێ تێستا دی ئێن ئەی بۆ زارۆیێن به‌رزه‌بوویی و چەند داخوازی وپێشنیارێن دیتر” كو پارێزگارێ هەلەبجە ئاراستەیی جڤاتا وەزیران کربوون، جڤاتا وەزیران، دووپات کر ژی كو حکومەتا هەرێما كوردستانێ، خۆ ب قەردارا کەسوکارێن شەهیدێن هەلەبجە و هەموو شەهیدێن کوردستانێ دزانیت و ئەرکێ حکومه‌تێ یه‌ خزمه‌تا خه‌لكێ هه‌له‌بجه‌ بكه‌ت.

جڤاتا وەزیران بڕیار دا، لژنه‌كێ ژ وەزارەتێن پەیوەندیدار پێك بینیت بۆ دووڤچوونا ب له‌ز و جێبەجێکرنا بڕگێن وێ یاداشتا بۆ وان هاتییه‌ ئاراسته‌ كرن، هه‌روه‌سا جڤاتا وەزیران دووپاتكر پێدڤییە حکومەتا عێراقێ، بەرپرسیاره‌تییا ئەخلاقی و دەستوورییا خوه‌ د قەرەبووکرنا کەسوکارێن شەهیدان و برینداران و زیان ڤێکەفتیێن کیمیا بارانا هەلەبجە و هه‌موو قوربانیێن جینۆسایدکرنا گەلێ کوردستانێ و ده‌ڤه‌رێن زیان ڤێکەفتی یێن دیتر یێن کوردستانێ بگریتە ستوویێ خوه‌ هەروەکو د مادێ 132 یێ دەستووری ئەڤ بەرپرسیارەتیيە ب ئاشکرایی خستییه‌ ستوویێ دەستهه‌لاتا فیدرالی.

بڕگا دیتر، پێكهاتبوو ژ گوتۆبێژکرنێ دەربارەی هێرشا مووشەکییا سەر هەولێرێ” سەرۆک وەزیرێن هەرێما کوردستانێ، ئاماژە ب هندێ دا كو ئه‌ڤه‌ هێرشە بۆ سەر ژیان و ئاسایشا وه‌لاتیێن هەرێما کوردستانێ و سەروەرییا عێراقێ و پێدڤییە عێراق و جڤاكێ نێڤدەولەتی، ڕێگریێ ل ڤان  جۆرە هێرشان و دەستدرێژیان بۆ سەر وه‌لاتیێن هەرێما کوردستانێ و عێراقێ بکەن.

سەرۆک وەزیران گۆت ژی: ئەو تۆهمەت و دده‌نه‌ پال هەرێما کوردستانێ، چ بنەما ژ بۆ نینن و دوورن ژ ڕاستیێ” ب ناڤێ جڤاتا وەزیران ژی، ب توندی ئیدانا وێ هێرشێ بۆ سەر وه‌لاتیێن هەولێرێ دكه‌ین، داخواز كرییه‌ لژنەكا نێڤدەوله‌تی ژ نوونەرێن نەتەوێن ئێكگرتی و کۆمکارا عەرەبی و کۆمارا ئیسلامییا ئیرانێ و عێراقێ و هەرێما کوردستانێ بهێته‌ پێكئینان بۆ دەرخستنا ڕاستییان و ڕەتکرنا وان تۆهمەتان.

هه‌روه‌سا جڤاتا وەزیران بڕیار دا وەزارەت و سازیێن حکومەتا هەرێما کوردستانێ، بهێنه‌ راسپاردن كو پێدڤییە نوكه‌ پتر لدووڤ تایبەتمەندییان بەرپرسیاره‌تی و به‌رسڤدان و چارەسەرکرنا کێشە و پێدڤیین وه‌لاتیێن هەرێما کوردستانێ بگرنە ستوویێ خۆ، ئەڤە ئەرکێ وەزارەتانه‌ نەکو ب تنێ یێ جڤاتا وەزیران.

د برگا دووماهییێ دا جڤاتا وەزیران، ئارامی دا فه‌رمانبه‌ران كو پارێ پێدڤی هاتییه‌ دابینکرن بۆ دابەشکرنا مووچێ مه‌ها شواتێ و وەزارەتا دارایی وئابووری، ل ڕۆژێن بهێنڤه‌دانا جەژنا نەورۆزێ ژی دا، دێ یا بەردەوام بیت د پرۆسا دابەشکرنا مووچەیی دا.