ل گۆرەی ئامارێن پارتییێن ئۆپۆزسیۆنا تورکیا بەلاڤ کرین، ب تنێ ل چەندین سالێن بووری حکومەتێ سەد و چل زیندانێن نوو ئاڤاکرینە، پلان ژی ئەوە ئەڤسالە ھەژدە زیندان ھاتینە دروستکرن و سالا بھیت ژی دێ سیھـ و نەھـ زیندان ھێنە ئاڤاکرن، ب وێ یبەکێ ژی ژ سالا دوھزار و چاردێ و تا نھا سەد و ھەشتێ زیندان ل تورکیا ھاتینە دروستکرن.
چاڤدێرێن کاروبارێن تورکیا ئاشکرا دکەن، ئەو ھەژمارا زیندان و گرتیخانان، وان زیندانێن نھێنی بخوەڤە ناگریت یێن دەزگەھێ ھەوالگێریێ و ئاساییش و سازیێن تایبەت بۆ بێدەنگکرنا ئازادییا رادەربڕینێ دروست کرین.
ل گۆرەی گۆتنا چاڤدێرێن کاروبارێن تورکیا، ئەو ئامارا زیندانان رەنگەڤدانا خرابا رەوشا ئازادیا رادەربڕینێ یە ل وی وەلاتی، ب شێوەیەکی قانوونێ ل گۆرەی حەزا سەرۆککۆماری دھێنە دارێشتن و نێزیکە کۆمارا تورکیا ببیتە کۆمارا زیندانان، ئاشکرا ژی دکەن، چەکێ د دەستێ رەجەب تەیب ئەردۆغانی دا، ب تنێ تەپەسەرکرن و زیندانکرن و دۆرپێچکرنە ل ناڤ و دەرڤەیا تورکیا.
پشتی کۆدەتایا سەرنەگرتی یا سالا دوھزار و شازدێ و تۆمەتبارکرنا فەتحوللا گویلەن، سەرۆکێ تەڤگەرا خزمەت ب وێ کۆدەتایێ، حکومەتا ئەردۆغانی نێزیکی دوسەد و شێست ھزار کەس دەستەسەرکرینە و ھندی وێ ھەژمارێ ژی ژ کارێن وان لاداینە.
