ئه‌میر ئۆسمان: کۆنفڕانسەک ل دۆر ئایین و باوەرییێ دێ ھێتە ئەنجامدان

ئاژانسا خانی” تایبەت:

بڕیارە کۆنفڕانسەک لدۆر ئایین و باوەرییێ بھێتە ئەنجامدان و رێڤەبەرێ پێکڤەژیانێ ژی ل وەزارەتا ئەوقاف و کارۆبارێن ئایینی ئاشکرا کر، بەری نوکە ژی کۆنفڕانسەک ل دۆر پێکڤەژیانێ بڕێڤەچوویە و ھەرێما کوردستانێ ژی بوویە سەنتەرێ پێکڤەژیانێ.

ئەمیر ئۆسمان، رێڤەبەرێ پێکڤەژیانێ ل وەزارەتا ئەوقافێ بۆ ئاژانسا خانی دیارکر” بڕیارە ل رۆژا ٢٧ی ھەیڤا ئۆکتۆبەرێ کۆنفڕانسەک لدۆر ئایین و باوەرییێ ل ھەرێما کوردستانێ بھێتە ئەنجامدان و مژارێن کۆنفڕانسی ژی دێ ئایین و باوەری و ئازادییا ئایینی بیت ل ھەرێما کوردستانێ، چونکی رۆژا ٢٧ی ئۆکتۆبەرێ رۆژا جیھانییا ئایین و باوەرییێ یە و مە ژی دڤێت ئەو رۆژە بھێتە زیندی کرن ل ھەرێما کوردستانێ و کەسێن بسپۆر و زانا و لایەنێن پەیوەندیدار دێ پشکدارییێ تێدا کەن.

ئەمیر ئۆسمانی گۆت ژی” بەری نوکە ژی کۆنفڕانسەک ھاتییە ئەنجامدان ل دۆر پێکڤەژیانێ و بەردەوام ئەم یێ کار لسەر پێکڤە ژیانێ دکەین دناڤبەرا ھەموو ئایین و پێکھاتان، چونکی ھەرێما کوردستانێ بوویە سەنتەرێ پێکڤەژیانا ئایینی و نەتەوەیی ھەر ژ کەڤندا ئەو پێکڤەژیانە ھەبوویە.