پشتی سەرەدانا بابا نوئێل بۆ مالا چاڤدێریا دانعەمران ل وەلاتێ بەلجیکا ھەژدە کەسان گیانێ خو ژ دەست دا، د دووڤ دا وەسا دیار بوو بابا نوئێل تووشی کۆرۆنا ببوو و ڤایرۆس بۆ وان کەسان ڤەگوھاستبوو.
رۆژناما دەیلی مەیل یا بریتانی بەلاڤکر، ئەو زەلامێ ب رۆلێ بابا نوئێلی رابووی، پشتی سێ رۆژان ژ سەرەدانا مالا چاڤدێریا دانعەمران ل باژێرێ ئەنتۆیربی ل باکورێ بەلجیکا دەرکەفت ھەلگرێ ڤایرۆسێ کۆرۆنایێ بوو.
بەرپرسێن ساخلەمیا بەلجیکا پشکنینا کۆرۆنایێ بۆسەرجەم وان کەسان کر یێن د مالا دانعەمران دا، وەسا دیار بوو سەد و بیست و ئێک کەس تووشی ڤایرۆسی بوون ، پێنج کەسان ب تنێ ل شەڤا کریسمسێ گیانێ خوە ژ دەست دا، سەرجەمێ گشتی ژی ھەژدە کەسان د مالا دانعەمران دا گیانێ خوە ژ دەست دا.
د وان وێنێن دەمێ سەرەدانا بابا نوئێل گرتین دەرکەفت، ھەژمارەکا دانعەمران ماسک بکارنەئینایە و پشکەکا دی ل نێزیک بابا نوئێل روونشتبوون.
وەزارەتا ساخلەمیا بەلجیکا، ل وەلاتێ وان ب تنێ د شەڤا کریسمسێ دا، دو ھزار و سێسەد و چل و دو تووشبویێن کۆرۆنایێ تۆمارکرن، ھەروەسا پێنجی و ئێک کەسان گیانێ خو ژ دەست دایە.
