چالاکڤانەکا چڤاکی ئاشکرا کر، ھەلبژارتنا ھەڤژینان ل نک ھندەک کەسان ب ساناھی کەفتییە ب رێکا سوشیال میدیایێ، لێ پەشیمانی ل دووڤ ڤێ ھەلبژارتنێ دھێت.
ئێک ژ وان کچێن ژیانا ھەڤژینیێ ب رێیا تۆرێن جڤاکی پێکئینای دیارکر، دەمێ سالەکێ یە ژیانا ھەڤژینیێ پێکئینای و ھەڤژینێ خوە ب رێکا فەیسبووکی نیاسی، پاش دەمەکێ کورت ژیانا ھەڤژینیێ پێکئینا، لێ وی درەو لێ کر ب ڤێ رێکێ وی ھەڤژینەکا دی بەری وێ ھەبوو دو زارۆ ژی ھەبوون و ئەو یەک بۆ ئاشکرا نەکربوو، ژبەر وێ یەکێ گەلەک یا پەشیمانە.
فه‌وزیا ئەحمەد، چالاکڤانا د بیاڤێ چڤاکی دا بۆ خانی نیوز گۆت: پشتی پێشکەفتنا تەکنولۆژیایێ و ھەبوونا ئەنترنێتێ دیاردا ھەڤژینیێ ب رێیا تۆرێن جڤاکی بەلاڤ بووییە، ئەڤ رێکە یا سەردەمیانەیە و یا جودایە ژ رێکا تەقلیدی، ڤێ رێکێ ئەرینی و نەرێنییێن خوە ھەنە لێ نەرێنیێن وێ پترن، نیاسین ب رێکا سوشیال میدیایێ دبیتە ئەگەرێ لێکتێنەگەھشتنێ و چەندین تشتێن ڤەشارتی د ناڤبەرا وان دا، ھەروەسان رەوشت و تیتال ژێک جودانە، لەورا گرنگە ب ھشیاری بریار بھێتە دان دا نەبیتە ئەگەرێ وێ چەندێ کو پاشەرۆژا خو ژ ناڤ ببەن.
فه‌وزیا ئەحمەد گۆت ژی: گەلەک گرنگە گەنج بریارا مالباتا خوە ژی وەربگرن دھەلبژارتنا خوەدا ژبەرکو ئەو خودان سەربۆرن، ھەروەسا گرنگە سمینار بۆ گەنجان بھێنە گۆتن ل سەرڤان بابەتان دا ھشیارببن و ب بریارەکێ پاشەروژا خوە خراب نەکەن، ژبەرکو پشتی بریارێ دبیت ژێکڤەبوون یا ب ساناھی نەبیت یان ھەکە ژێکڤەبوون ھەبیت ژی دێ چەندین زیان و قوربانیان ل پشت خوە ھێلن.
خانی نیوز، مەنیجا ئەیوب
