حاكمێ ئیماراتا دوبه‌ى، ئه‌ڤرۆ بودجا سالا بهێت یا دوبه‌ى په‌سه‌ند كر، كو ب سه‌نته‌رێ دارایى و كاركرنێ ل ئیماراتێ دهێته دانان، بودجا سالا 2021ێ بۆ 15.5 ملیار دۆلاران هاتییه كێمركرن، ئه‌و ژى ژبه‌ر په‌ژیكا كۆرۆنایێ كو كارتێكرن ل سه‌ر كه‌رتێ دارایى و كه‌رتێن دیێن وه‌لاتى كرییه.
ئیماراتا دوبه‌یى، ئێكه ژ حه‌فت ئیمارا‌تێن ئیماراتا ئێكگرتییا عه‌ره‌بی، بۆ بودجا 2020ێ ب 18.1 ملیار دءلاران ریكءرد توماركرییه.
نڤێسینگه‌ها راگه‌هاندنا شێخ محه‌مه‌د بن راشد ئالمه‌كتووم، حاكمێ دوبه‌یى دبێژیت: ئه‌وێ بودجێ گه‌شه‌كرنا تایبه‌تا ره‌وشا ئابوورى یا سالا 2020ێ ل به‌رچاڤ وه‌رگرتییه، كو تێدا په‌ژیكا كۆرۆنایێ كارتێكرن ل سه‌ر ئابوورێ هه‌موو جیهانێ كرییه.
پتریا ئابوورێ ئیماراتێ پشت به‌ستنێ ل سه‌ر كه‌رتێ گه‌شتیارى و بازرگانى دكه‌ت، به‌لێ ڤى وه‌لاتى ل سالا 2020ێ ب ئه‌گه‌رێ په‌ژیكا كۆرۆنایێ نه‌چاربوون چه‌ندین هه‌یڤان سنۆرێن خوه دائێخن، ئه‌ڤه‌ژى بۆ ئه‌گه‌را نزمبوونا به‌رهه‌مێ ناڤخوه‌یى ب رێژا 10.8 ژ نیڤا ئێكێ ژ ڤێ سالێ، ره‌نگه ژى ئابوورێ وێ ب رێژا 6.2% دڤێ سالێ دا كێمبكه‌ت، به‌لێ چاڤه‌رێیا هندێ دكه‌ن كو د سالا 2021ێ دا ب رێژا 4% گه‌شه بكه‌ت.
نڤێسینگه‌ها راگه‌هاندنا حاكمێ دوبه‌یى گۆتى ژى: بودجا نوو پشتراست دكه‌ن، كو خه‌لكێ دوبه‌ى شیانێن هه‌ین ل گه‌ل قه‌یرانان خۆ بگونجینن، ژبه‌ركو گه‌شه‌كرنا ئابوورى دێ ده‌ست پێكه‌ته ڤه.
گه‌شت و گوزار ژێده‌رێ سه‌ره‌كیێ داهاتێ دوبه‌یه، كو د سالا بوورى دا پێشوازى ل 16 ملیۆن گه‌شتیاران كرییه، ئه‌ڤ ساله ژى به‌رى په‌ژیكا كۆرۆنایێ ل جیهانێ به‌لاڤ ببیت، دوبه‌ى ئارمانج هه‌بوو كو هه‌ژمارا گه‌شتیاران بكه‌نه 20 ملیۆن كه‌س.
