جڤاتا ئاسایشا هه‌رێما كوردستانێ ل دۆر هێرشا شڤێدى یا سه‌ر هه‌ولێرێ راگه‌هاندنه‌ك به‌لاڤكر.
ده‌قێ راگه‌هاندنێ:
هێرشا تیرۆرستى یا شه‌ڤا بوورى بۆ سه‌ر هه‌ولێرێ، درێژییا ئه‌وان هێرشا یه كۆ ب مه‌به‌ستا درۆستكرنا فشارێ بۆ سه‌ر هه‌رێمێ دهێنه ئه‌نجامدان.
ئه‌و درۆنا بۆ وێ هێرشێ هاتییه بكارئینان، ژ سنوورێ باژێركێ پردێ ژلایێ میلیشیایێن حزبوللا ڤه ئاراسته‌ى هه‌ولێرێ هاتییه‌كرن.
پشتى وێ هێرشێ، چه‌ندین سایتێن فه‌رمى یێن سه‌ر ب هێزه‌كا ناوچه‌ى، وه‌ك جارێن پێشتر، وه‌سا به‌لاڤكرییه كۆ دڤێ هێرشێ دا ترۆمبێله‌كا سه‌ر ب موسادا ئسرائیلى ڤه هاتیه ئارمانجكرن و هاتییه راگه‌هاندن كۆ كه‌سه‌ك تێدا هاتییه كۆشتن. دبیت ئه‌و بشێن دره‌وان ل رایا گشتى یا خۆه بكه‌ن، به‌لێ بۆ خه‌لكێ هه‌ولێرێ و هه‌رێمێ كۆ ب چاڤێن خۆه جهێ هێرشێ دبینن، ئه‌ڤ دره‌وه دبنه جهێ ترانه‌پێكرنێ.
ئه‌وێن ڤان بانگه‌شان دكه‌ن، دڤێت شكه‌ستن و لاوازییا خۆه په‌رده‌پۆش بكه‌ن، ئه‌گه‌ر نه بلا بشێن ئێمناهییا ناڤ پایته‌خت و باژێرێن خۆه ب پارێزن.
هه‌رێما كوردستانێ چ جاران نابیته پێگه‌هه‌ك بۆ گه‌فان ل سه‌ر وه‌لاتێن ده‌ڤه‌رێ، د هه‌مان ده‌م دا، پێدڤى یه ئه‌و وه‌لاته ژى رێزێ ل سه‌روه‌رییا خاك و گه‌لێ هه‌رێما كوردستانێ و عیراقێ بگرن.
جڤاتا ئاسایشا هه‌رێما كوردستانێ
9/6/2022
