ئاژانسا خانی:
د چارچۆڤێ به‌رنامه و پلانێن هاتینه دانان بۆ كۆمبوونێن په‌رله‌مانێ عیراقێ ل سه‌ر په‌سه‌ندكرنا بۆدجه‌یێ عیراقێ یێ سالا 2024 ێ، ل دووماهى یا حه‌فتییا بورى لژنا دارایى ل په‌رله‌مانێ عیراقێ ئێكه‌م كۆمبوونا خوه ئه‌نجامدا و به‌رنامه‌ك بۆ كۆمبوونێن بۆدجه‌یێ گشتییێ ئه‌ڤ ساله دانان داكو ب زووترین ده‌م بابه‌ت ب دووماهى بهێت و چ گوهۆرینێن پێدڤى هه‌بن بۆ سه‌رۆكاتییا په‌رله‌مانى بهێته بلندكرن و رۆژه‌ك بهێته ده‌ست نیشانكرن بۆ په‌سه‌ندكرنا وی بۆدجه‌یی.
د. خه‌لیل غازى دۆسكى، ئه‌ندامێ لژنا دارایى ل په‌رله‌مانێ عیراقێ بۆ ئاژانسا خانی دیار كر: په‌سه‌ندكرنا پرۆژێ بودجه‌یێ ئه‌ڤ ساله پێدڤى ب خواندنا ئێك و دووێ نینه به‌لكو ئێكسه‌ر دێ چیته ده‌نگدانێ، بتنێ ب مه‌رجه‌كى ئه‌گه‌ر سه‌رۆكاتییا جڤاتێ یان لژنا دارایى ل په‌رله‌مانى ب گرنگى دیت هنده‌ك به‌نده ژ پرۆژه قانوونێ بهێنه گوهۆرین وى ده‌مى دێ پێدڤى ب ده‌مه‌كێ درێژ بیت هه‌تا ئه‌و راستڤه‌كرن بچنه خواندنا ئێكێ و دووێ و لدووڤ دا بچیته ده‌نگدانێ، ب گشتى بۆدجه‌یێ عیراقێ یێ سالا 2024ێ نێزیكى (212) ترلیۆن دیناران هاتییه خه‌ملاندن، ژڤێ هژمارێ (55) ترلیۆن بۆ بۆدجه‌یێ وه‌به‌رهێنانێنه، (156) بۆ بۆدجێ ته‌شغیلى هاتینه ده‌ست نیشانكرن، پشكا هه‌رێما كوردستانێ ل سه‌ر دو به‌ندێن سه‌ره‌كى هاتیه دابه‌شكرن و ئێك بۆ مووچێن فه‌رمانبه‌ران كو سالانه (9) ترلیۆن و (556) ملیار دینارێن عێراقینه، بۆ خانه‌نشین و چاڤدێرییا جڤاكى نێزیكى (2) ترلیۆن و نیڤان هاتینه‌ده‌ست نیشانكرن، بۆدجه‌یێ وبه‌رهێنانێ نێزیكى (5) ترلیۆن دیناران هاتیه ده‌ست نیشانكرن و كوژمێ گشتى دبیته(21) ترلیۆن و (910) ملیار دینار ژ ئه‌ڤى كوژمى ترلیۆنه‌ك و 116 ملیار دینار دێ بۆ ئه‌وا قه‌رزان هێنه ڤه‌گه‌ران ئه‌وێن هه‌رێما كوردستانێ پێشتر ژ چه‌ندین بانكان كرین، كێمتر ژ (20) ترلیۆن دیناران دێ بۆ بودجا هه‌رێما كوردستانێ مینت.
د. خه‌لیل غازى دۆسكى ئه‌و ژی گۆت: پشتى بابه‌تێ مووچه‌یی ژلایێ دادگه‌ها فیدرالیڤه هاتییه ئێكلاكرن كو په‌یوه‌ندى نامینیت ب كێشانڤه دناڤبه‌را هه‌رێم و به‌غدا دا و بریار دایی كو دڤێت مووچه هه‌مى بهێنه‌دان، ئه‌ڤه و پشتى مه‌رجێن داهاتێ نافخوه و بابه‌تێ (ته‌وتینێ) بهێته بجهئینان و ئه‌ڤه ب دووماهى هاتییه و ب تنێ مایه رێكخستن و لیستێن مووچه‌یى و (ته‌وتینێ) ئه‌ڤێ چه‌ندێ ژى ده‌م بۆ دڤێت دا بابه‌تێ رێكخستى بیت و ب كێمترین شاشى ده‌ربازبیت.
ناڤهاتی گۆت ژی: كوژمێ و به‌رهێنانێ و پێدڤیێن خزمه‌تگوزارى كو پتر ژ (7) ترلیۆن دینار بۆ هاتیه ته‌رخانكرن و ئه‌ڤه‌ژى یێ گرێدایه ب نه‌فه‌قاتێن فێعلیڤه، به‌لێ زێده‌تر ئه‌ڤه دیكورى نه ئانكو شكلینه و وه‌زاره‌تا دارایى ل سه‌رانسه‌رى عیراقێ جۆداهییه‌كێ دكه‌ت د مه‌زاختنێ دا دناڤبه‌را پارێزگه‌ها و به‌غدا پایته‌ختى دا و ترسا مه ئه‌وه كوژمه‌كێ كێمێ ڤى پاره‌یى بهێـته مه‌زاختن، چونكی ئه‌ڤه چه‌ندین ساله حوكمه‌تا هه‌رێما كوردستانێ بۆدجه وه‌رنه‌گرتییه و تایبه‌ت بۆدجه‌یێ وه‌به‌رهێنانێ و یا گه‌شه‌پێدانا هه‌رێما و هیڤیدكه‌ین ئه‌ڤ ساله بشێن ئه‌ڤى بابه‌تى قه‌ره‌بوو بكه‌ین و گڤاشتنێن سه‌ركردایه‌تییا سیاسییا هه‌رێما كوردستانێ و حوكمه‌تا هه‌رێما كوردستانێ دڤى بیاڤى دا دبه‌رده‌وام بن و ئه‌م ژى دێ دهاریكار و پشته‌ڤان بین ل سه‌ر ڤێ چه‌ندێ.
ئه‌و ژی دیار كر: هیڤیدكه‌ین چ رێگرى نه‌هێنه پێش بۆ ئه‌ڤان كوژمێن هاتینه ته‌رخانكرن و حوكمه‌تا عیراقێ ئه‌ڤان پشكان بۆ هه‌رێما كوردستانێ ره‌وانه بكه‌ت و ئه‌گه‌ر هات و رێژه‌كا باش ژ ئه‌ڤێ بۆدجێ بهێته جێبه‌جێكرن دێ كاریگه‌رییه‌كا مه‌زن هه‌بیت ل سه‌ر ئابوور و خزمه‌تگوزاریێن هه‌رێما كوردستانێ و ئه‌ڤه مافه‌كێ ره‌وایێ خه‌لكێ هه‌رێما كوردستانێ یه كو ئه‌ڤه چه‌ندین ساله ژێ هاتینه بێ به‌هركرن.
