ئاژانسا خانی:
د. نەوزاد عەبدوللا، بەرپرسێ لقێ ئێک یێ پارتی دیموکراتی کوردستان، بۆ ئاژانسا خانی دیار کر: بۆ ساخكرنا بیره‌وه‌رییا 48 ێ، یا شۆره‌شا 26 گۆلانا پێشكه‌ڤتنخواز، لقێ ئێكێ پارتی ب سه‌رپه‌رشتیا راسته‌خۆ یا به‌رپرسێ لقێ ئێك، ئەڤرۆ شه‌مبییێ 25 ی گولانێ هه‌تا رۆژا دوشه‌مبی 27 ی گولانێ ل ده‌مژمێر 4:00ی ئێڤاری، دێ خیڤه‌تگه‌هه‌كێ ل گوندێ كه‌مه‌كا ب پشكدارییا 100 پێشمه‌رگێن شۆره‌شا گولانێ و 400 گه‌نجان دانیت.
ناڤهاتی گۆت ژی: د ڤێ خیڤه‌تگه‌هێ دا دێ 10 كه‌پر هێنه دانان كو ده‌ربڕینێ ژ هه‌می به‌شێن شۆره‌شێ دكه‌ن و دێ كه‌ره‌سته و چالاكیێن سه‌رده‌مێ شۆره‌شێ هێنە نیشاندان و 400 خیڤه‌ت بۆ ڤێ مەرەمێ هاتینه دانان و ئه‌ڤ چالاكییه دێ بۆ دەمێ سێ رۆژان یا به‌رده‌وام بیت.
د. نەوزادی گۆت ژی: هەر د وێ خیڤەتگه‌هێ دا دێ ئاهه‌نگ و چالاكیێن هونه‌ری ب پشكدارییا هونەرمەند حه‌سه‌ن شه‌ریف و شاكر محه‌مه‌د ئه‌مینی، وه‌كو هونه‌رمه‌ندێن شۆره‌شا گولانێ و نیشاندانا شانۆگه‌رییه‌كێ كو ده‌ربرینێ ژ سه‌رده‌مێ شۆره‌شێ دكه‌ت هێتە نیشاندان.
