وەزیرێ ئەوقاف و کاروبارێن ئایینی یێ هەرێمێ د شەشەمین کۆنفڕانسێ لالش بۆ ئاشتی و پێکڤەژیانێ دا ل شنگالێ ب نوینەراتییا حکومەتا هەرێمێ گوتارەك پێشكێش کر و تێدا دیاركر، حکومەتا هەرێمێ دێ هەمی بزاڤان كەت ل گەل حکومەتا عیراقێ خزمەتا زێدەتر یا خویشك و برایێن ئێزدی بکەت ژ هەمی ڕوویەكی ڤە.
پشتیوان سادق، وەزیرێ ئەوقاف و کاروبارێن ئایینی دیار ژی كر، خویشك و برایێن ئێزدی و هەمی کۆمەلگەها عیراقی و دەڤەرێ ب ئەگەرێ ڕەفتارێن داعشێ تووشی ئازارێن مەزن بووینە. هەرچەندە پێشمەرگە و هەڤپەیمانییا نێڤدەولەتی شیان تا ڕاددەیەكێ مەزن شكەستنێ ب داعشێ بینن، لێ پشتی سەركەفتنا پێشمەرگەی پێدڤییە هێزێن عیراقێ و هەڤپەیمانییا نێڤدەولەتی ژ ڕوویێ یاسایی، ئابووری و کۆمەلایەتی ڤە گرنگییێ ب ڕەوشا ژیانا خویشك و برایێن ئێزدی بدەن و ڕێخۆشكەر بن بۆ بجهـئینانا ڕێككەفتناما ئاساییكرنا ڕەوشا شنگالێ داكو خەلكێ وێ ڤەگەڕن.
زێدەتر ئاماژەكر، نە ڤەگەڕیانا وەلاتییێن ئێزدی بۆ جهێن خۆ، مەزنترین زیانە ببەر نوكە و پاشەڕۆژا وان بكەڤیت و پێشێلكارییەكا مەزن یا مافێن مرۆڤی یە. حکومەتا هەرێما کوردستانێ ئەوا د شیان و دەستهەلاتا وێ دا بیت بۆ وەلاتییێن ئێزدی درێخی نەكریە و چارەسەركرنا پشكەكا كێشەیێن وان ژی د شیانێن حكومەتا عیراقێ و كۆمەلگەها نێڤدەولەتی دایە.
