نێچیرڤان بارزانى سه‌رۆكێ هه‌رێما كوردستانێ دكۆمبوونا خۆدا دگه‌ل جه‌نه‌رال كیڤن لیهى، فه‌رمانده‌یێ هێزێن هه‌ڤپه‌یمانییا نێڤده‌وله‌تییا دژى داعشێ ل عیراقێ و سووریا و شاندێ دگه‌لدا، به‌حسا ڕه‌وشا ئه‌منییا ده‌ڤه‌رێ كر.
ل دووڤ ڕاگه‌هاندنا سه‌رۆكایه‌تییا هه‌رێما كوردستانێ، هه‌ردوولا هه‌ڤرابوون كو داعش هێشتا مه‌ترسییه‌كا جددی و ڕاسته‌قینه‌یه، به‌رده‌وام گه‌فان ل ئارامى و سه‌قامگێرییا ده‌ڤه‌رێ دكه‌ت، ل دۆر ڤێ چه‌ندێ دووپاتى ل گرنگى و پێدڤییا به‌رده‌وامییا ئه‌ركێ هه‌ڤپه‌یمانییا نێڤده‌وله‌تى و هاریكاری هه‌ڤپشكییا له‌شكه‌رێ عیراقێ و پێشمه‌رگه‌ى دگه‌ل هێزێن هه‌ڤپه‌یمانان بۆ به‌رهنگاربوونا تیرۆرێ و پشتراستبوون ژ شكاندن و ژناڤبرنا ب ئێكجارییا داعشێ كر.
د ته‌وه‌ره‌كێ دیدا، دووماهى پێنگاڤێن پرۆسه‌یا ئێكخستنا پێشمه‌رگه‌ى و چاكسازییێ ل وه‌زاره‌تا كاروبارێن پێشمه‌رگه‌ى كه‌ڤتنه به‌ر گوتوبێژان و به‌حسا داكۆكییا سه‌رخستنا پرۆسه‌یێ هاته‌كرن.
نێچیرڤان بارزانى دووپاتكر هه‌رێما كوردستانێ بۆ سه‌رخستنا چاكسازییێ و ئێكخستنا پێشمه‌رگه‌ى و نه‌هێلانا ئاسته‌نگان یا ڕژده، په‌سنا هاریكارى و پشته‌ڤانییا هه‌ڤپه‌یمانییا نێڤده‌وله‌تی د پرۆسه‌یێدا كر.
