ب هەلكەفتا دووماهی هاتن و سەرکەفتنا هەلبژارتنا پەرلەمانا کوردستانێ، ب گەرمی پیرۆزباهییێ ل تەمامیا گەلێ کوردستانێ ب هەمی پێکهاتێن وێ ڤە دکەم، هەلبژارتن و پرۆسەیا دەنگدانێ، هەلگرتنا پێنگاڤەكا گرنگ بوو د بهێزکرنا ڕەوتا دیموکراسییا گەلێ کوردستانێدا، هاریکاریا هەمی لایان بۆ سەرئێخستن و ئەنجامدانا بێ ئاریشەیا پرۆسەیێ، جهێ شانازی و سپاسدارییێ یە، د ڤێ سەرکەفتنێدا، گەلێ کوردستانێ سەرکەفتییە.
هەلبژارتن نویکرنا ڕەوایەتیا دامەزراوێن هەرێما کوردستانێ و گەهاندنا ئازادانەیا بیر و دەنگێ هەوە بوو، بۆ دیارکرنا نوینەرێن هەوە د پەرلەمانێ دا. ئەوا د گیانێ کێبڕکێیا ئاشتیانە و ڕێژەیا پشكدارییا بەرفرەها وەلاتییان د بانگەشە و پرۆسەیا دەنگدانێدا هاتە دیتن، وێ یەکێ دسەلمینیت کو گەلێ کوردستانێ یێ ل سەر وێ یەکێ کو بنەمایێن دیموکراسیێ و مافێ خۆ بۆ بڕیاردان د چارەنڤیس و پێشەرۆژا خۆ دا، بهێز بکەت و نیشانا زیندیبوون و پێگەهشتنا زێدەترا کەلتورێ دیموکراسیا گەلێ کوردستانێ یە.
گەلەک سپاس بۆ وەلاتییێن کوردستانێ، هەروەسا بۆ بزاڤ و تێکۆشینا هێزێن ئەمنی، کۆمیسیۆنا بلندا سەربخۆیا هەلبژارتنان، حکومەت و لایەنێن پەیوەندیدارێن عیراقێ، یونامی و تەمامیا وان لایەنێن د بڕێڤەبرن و سەرخستنا ڤێ پرۆسەیێ دا بەشدار بووین. پابەندی و هاریکاریا هەمی لایێن هەوە، کلیلا ڤێ سەرکەفتنێ بوو. دەستخۆشی و سپاسداریا خۆ ئاراستەی هەمیان دکەین.
ئەنجامدانا هەلبژارتنان ب شێوەیەکێ ئارام و شارستانی، سەرکەفتنەکا مەزنە کو جیهان ب ڕێزڤە سەحدكەتێ، لێ ئەوا ڤێ سەرکەفتنێ تەمام دکەت و گەلێ کوردستانێ ب دلگەرمیڤە چاڤەڕێ یە، ئەوە کو پشتی پەسەندکرنا ئەنجامان، لایەنێن سیاسی ب زویترین دەم حکومەتێ پێکبینن.
حکومەتەك کو بشێت سەقامگیریەکا بهێزتر و ئابووریەکا بهێز دیاربكەت و گرنگییا زێدەتر ب مافان بدەت، پێدڤیەکا پێشینەیا قۆناغ و ئاستەنگێن نوکە و ئاڤاکرنا پێشەرۆژا هەڤپشکا مەیە، ئەو ژی ب گیانێ پێکڤەیی و تەڤاهی و هاریکاریا هەمی لایەنێن سیاسی و پێکهاتان دگریت.
