دهقێ پهیاما سهرۆكێ ههرێما كوردستانێ؛
د (38)ەمین سالڤەگەرا کیمیابارانکرنا هەلەبجەدا، ب ڕێز و شکۆڤە یادا شەهیدێن بێگونههێن وێ کارەساتێ دکەینەڤە، کو ل 16ی ئادارا 1988 ڕژێما وی سەردەمی یا عێراقێ دەرهەق ب گەلێ کوردستانێ ئەنجام دا و دێ بۆ هەر دەم وەك برینەکا ڤەکری یا نیشتمانی مینیتەڤە.
سەری بۆ گیانێ پاقژێ شەهیدێن هەلەبجە و هەموو کوردستانێ دچەمینین. سلاڤان بۆ کەسوکارێن وان یێن سەربلند و هەمی قوربانییان هنێرین.
هەلەبجە ب تنێ بزاڤەکا ژناڤبرنا جەستەیی یا کوردان نەبوو، بەلکو تاوانەکا دژی مرۆڤایەتییێ و هێرشەکا دڕندانە بوو سەر ئیرادا گەلەکێ کو ب تنێ داخوازا ژیان و ئازادیێ دکر. هەلەبجە وەك شاهدەکێ زیندی یێ دیرۆكێ د ویژدانا جیهانێ دا دێ مینیتەڤە، داکو مرۆڤایەتی وانەیان ژێ وەربگریت و ڕێگریێ ل دووبارەبوونا هەر جۆرە کۆمەڵکوژییەکێ بکەت، ل هەر دەرەکا جیهانێ بیت.
د ڤێ یادێ دا، جەختێ ل سەر بەرپرسیارەتیا حکومەتا فیدرالی یا عێراقێ بەرامبەر هەلەبجە و قوربانییێن وێ دکەینەڤە. ل دویف بڕیارا دادگەها بلندا تاوانێن عێراقێ کو تاوانا کیمیابارانکرنا هەلەبجە وەك جینۆساید ناساند، پێدڤییە قەرەبوویا شایستە یا قوربانییان بکەتەڤە، داکو دادپەروەری بۆ قوربانییان بهێتە دیارکرن. هەروەسا ل هەرێما کوردستانێ ژی دڤێت باشترین خزمەت و چاڤدێریا پێدڤی پێشکێشی بەرکەفتییێن وێ تاوانێ بهێتە کرن.
ئەڤرۆ کو دەڤەر د ڕهوشهكا مەترسیدار یێ شەڕی دا دەرباز دبیت، ئەرکەکێ گران یێ نیشتمانی ل سەر شانیێن مە ههموویانه بۆ پاراستنا هەرێما کوردستانێ. د ڤێ ڕەوشا هەستیار دا، ئێکڕیزی و تەبایی تاکە ڕێکا پاراستنا دەستکەفتان و ڕووبەڕووبوونا ئالنگارییانە.
هەمی قەرزارێن خوینا شەهیدانین و باشترین وەفاداری بۆ گیانێ وان یێ پاقژ، کارکرنا پێکڤەییە بۆ دویرخستنا مەترسییان ل سەر گەل و ئاخا کوردستانێ.
دگەل هەمی سەختی و ئالنگارییان ژی، ئەم ب هیڤی و ئومێدەکا مەزن بەرەڤ پاشەڕۆژەکا باشتر بۆ گەلێ کوردستانێ دڕوانین و د پشتڕاستین کو پاشەڕۆژا گەلێ کوردستانێ یا ڕوونه. دروود بۆ گیانێ پاقژێ شەهیدێن هەلەبجە و هەموو شەهیدێن کوردستانێ.
